Kriptovalyuta dünyasının ən barışmaz və sadiq əleyhdarlarından olan milyarder investor Piter Şiff (Peter Schiff), rəqəmsal aktivlər üçün növbəti dəfə "qiyamət günü" ssenarisi cızıb. Yahoo Finance tərəfindən paylaşılan və birjada ciddi ajiotaj yaradan proqnoza görə, Şiff "X" sosial şəbəkəsindəki son bəyanatında Bitcoin (BTC) investorlarını kütləvi iflasın gözlədiyini iddia edib. Onun fikrincə, rəqəmsal qızılın yaxın aylardakı marşrutu kəskin enişlə xarakterizə olunacaq.
Piter Şiff hesab edir ki, kripto investorlarının hazırkı sakitliyi və bazara olan kor-koranə inamı fırtınadan əvvəlki səssizlikdir. Onun irəli sürdüyü texniki analiz və psixoloji ssenari domino effekti üzərində qurulub. Onun sözlərinə görə, Bitcoin əvvəlcə 50 min dollar səviyyəsindən aşağı düşəcək, daha sonra isə sürətlə 20 min dollardan da aşağı enəcək.
Şiffin fikrincə, bu kəskin eniş illərdir aktivlərini satmayan və "hodler" adlandırılan sadiq kripto kütləsinin belə dözümünü sarsıdacaq və tarixin ən böyük kütləvi satış dalğasını tetikləyəcək. O, Bitcoin-i daxili dəyəri (intrinsic value) olmayan spekulyativ bir köpük hesab edir və investorları rəqəmsal illüziyalar yerinə real fiziki qızıla sərmayə qoymağa çağırır.
Bitcoin tərəfdarları və kripto icması isə bu bəyanatı növbəti bir "yumor" və "FUD" (qorxu və qeyri-müəyyənlik yaratma cəhdi) kimi qarşılayıb. Şiffin illərdir səsləndirdiyi proqnozların boşa çıxdığını xatırladan investorlar sosial şəbəkələrdə ona qarşı sərt və satirik cavablar veriblər. Bazar İştirakçısının Şərhi: "Piter Şiff Bitcoin hələ 1 000 dollar olanda da onun tezliklə öləcəyini deyirdi. Bu gün sadəcə proqnozundakı rəqəmlərin yerini dəyişir, amma mesaj eynidir. Karvan isə yoluna davam edir."
Analitiklər qeyd edirlər ki, hətta qiymət Şiffin dediyi səviyyələrə düşsə belə, böyük institusional investorlar (məsələn, BlackRock, Fidelity) və fərdi "balinalar" bunu çöküş kimi deyil, tarixin ən böyük "endirimli alış imkanı" (buy the dip) kimi qiymətləndirib bazara daha böyük kapitalla daxil olacaqlar.
Şiffin proqnozu hələlik bazarda hər hansı bir panika yaratmayıb. Cari texniki mənzərə və rəqəmlər Bitcoin-in qlobal makroiqtisadiyyat daxilindəki yerini belə göstərir: Bitcoin hələ də 2025-ci ilin sonlarında qeydə alınmış təxminən 126 min dollarlıq tarixi maksimumundan 47% aşağı səviyyədə ticarət olunur.
Piter Şiff qlobal iqtisadiyyatda qızıl əsaslı ənənəvi sistemi müdafiə etməklə öz reputasiyasını qorumağa çalışır. Lakin rəqəmsal aktivlər bazarı artıq milyardlarla dollarlıq ETF-lər (birja fondları) və dövlət tənzimləmələri ilə qanuniləşib. Yaxın aylar Şiffin "haqlı tənqidçi", yoxsa "zamandan geri qalmış investor" olduğunu bir daha sübut edəcək.
MONETAR.AZ
