Bakıda keçirilən “Xəzər regionuna investisiyalar” adlı işgüzar paneldə çıxış edən Rusiyanın Azərbaycandakı səfiri Mixail Yevdokimov iki ölkə arasında turizm və iqtisadi əməkdaşlığın gələcək hədəfləri barədə mühüm bəyanatlar verib. Səfirin sözlərinə görə, Moskva yaxın bir-iki il ərzində Azərbaycana səfər edən rusiyalı turistlərin sayında tarixi rekorda imza atmağı planlaşdırır.
Diplomat etiraf edib ki, son dövrlərdə regionda, xüsusilə qonşu İran ətrafında alovlanan hərbi-siyasi vəziyyət qlobal logistika ilə yanaşı, regional turist axınına da mənfi təsir göstərib və müəyyən azalmalara səbəb olub. Buna baxmayaraq, Rusiya tərəfi bu iqtisadi dalğalanmanın müvəqqəti olduğunu və yaxın müddətdə marşrutların tam bərpa ediləcəyini proqnozlaşdırır.
Rusiya uzun illərdir ki, Azərbaycanın turizm bazarında əsas pay sahiblərindən biridir. Coğrafi yaxınlıq, vizasız rejim və dil maneəsinin olmaması bu axını sürətləndirən əsas amillərdir. Rusiya gələn il (2027) və ya ən geci növbəti iki il ərzində Azərbaycana gələn rusiyalı turistlərin illik sayını 1 milyon nəfərə çatdırmağı hədəfləyir. Səfirlik bəyan edib ki, bu hədəfə çatmaq üçün Rusiya tərəfi turist axınının sabit və dayanıqlı artımını təmin edəcək xüsusi təşviq tədbirlərini davam etdirəcək.
Rusiyalı turistlərin sayının bu həddə çatması təkcə turizm sektoruna deyil, həm də Bakı və regionlardakı hotelçilik, iaşə xidmətləri, nəqliyyat və daxili ticarət dövriyyəsinə multi-milyonluq əlavə vəsaitlərin daxil olması deməkdir.
İşgüzar paneldə səfir turizmin infrastruktur dayağı rolunu oynayan bank-maliyyə sisteminə də toxunub. O, Rusiya və Azərbaycan banklarının qarşılıqlı hesablaşmalarda böyük uğura imza atdığını vurğulayıb. Ölkələr arasında ticarət və xidmət əməliyyatları uğurla milli valyutalarla (Rubl və Manat) həyata keçirilir.
Səfir öz təcrübəsini bölüşərək qeyd edib ki, Bakıdan manatla göndərilən vəsait cəmi 1.5 saat ərzində Rusiya bankındakı hesaba rubl olaraq oturur. Bu sürətli və rəqəmsal konvertasiya regionda fəaliyyət göstərən iş adamları və gələcək turistlər üçün maliyyə əməliyyatlarını maksimum dərəcədə asanlaşdırır.
MONETAR.AZ
