Azərbaycanda bankların aktivlər üzrə mümkün zərərləri qarşılamaq üçün yaratdığı xüsusi ehtiyatlara ayırmalar son bir ildə 29,4 faiz artıb. Banklar bu məqsədlə 292,2 milyon manat vəsait ayırıblar.
Monetar.az xəbər verir ki, Mərkəzi Bankın məlumatına əsasən, 2025-ci il avqustun 31-i ilə 2026-cı il avqustun 31-i arasında bankların aktivlər üzrə mümkün zərərlərin ödənilməsi üçün ayırmaları 225,9 milyon manatdan 292,2 milyon manata yüksəlib.
Beləliklə, bankların ehtiyat xərcləri bir il ərzində 66,3 milyon manat artıb.
Bu artım bankların əməliyyat mənfəətinin yüksəlməsi fonunda baş verib. Bank sektorunun əməliyyat mənfəəti 1,19 milyard manatdan 1,49 milyard manata çataraq 25,3 faiz artıb.
Ehtiyatlara ayırmalar çıxıldıqdan sonra vergilər ödənilənədək mənfəət 962,2 milyon manatdan 1,20 milyard manata yüksəlib. Artım 24,2 faiz təşkil edib.
Bankların xalis mənfəəti də 774,3 milyon manatdan 949,7 milyon manata çatıb. Bu, 175,4 milyon manat və ya 22,6 faiz artım deməkdir.
Maraqlıdır ki, eyni dövrdə bankların qeyri-işlək kreditlərinin həcmi də 791,2 milyon manatdan 946,8 milyon manata yüksəlib. Beləliklə, problemli kreditlər 19,7 faiz artıb.
