Rəqəmsal aktivlərin təhlükəsizliyi üçün həllər hazırlayan “Shard” şirkətinin ekspertlərinin hesablamalarına görə, 2026-cı ilin birinci yarısında iri beynəlxalq kripto servislərə haker hücumlarının sayı ötən ilin eyni dövrü ilə müqayisədə 2,5 dəfə artaraq 211-ə çatıb.
Bununla belə, kiberhücumlar nəticəsində dəyən ümumi zərər təxminən iki dəfə azalaraq bir il əvvəlki 2,1 milyard dollardan 1,3 milyard dollara düşüb. 2025-ci ilin birinci yarısında itkilərin 1,4 milyard dollardan çoxu “Bybit” kriptobirjasına edilən hücumun payına düşüb.
2026-cı ildə hakerlər həm kriptobirjalara, həm də fərdi istifadəçilərin vəsaitlərinə hücum ediblər. Rusiya ilə əlaqəli aktivlər də kiberhücumların hədəfinə çevrilib. Belə ki, aprel ayında Qırğızıstanda qeydiyyatdan keçmiş və rublla ifadə olunan A7A5 steyblkoininin ticarətində əhəmiyyətli paya malik “Grinex” kriptobirjası hücuma məruz qalıb.
“Kommersant”ın sorğusunda iştirak edən ekspertlərin fikrincə, infrastrukturu haker hücumlarından tam qorumaq mümkün deyil. Bununla belə, platformalar çoxsəviyyəli müdafiə sistemi hesabına müştərilərə dəyən zərəri minimuma endirə bilərlər.
“Crosstech”in xidmətlərin inkişafı istiqamətinin rəhbəri İldar Qalıyev bildirib ki, belə müdafiə sistemi şəbəkənin seqmentləşdirilməsi və kritik komponentlərin izolyasiyası, çoxfaktorlu autentifikasiya, eləcə də son cihazların və serverlərin qorunmasını əhatə etməlidir. Aktivlərin qorunması üçün əlavə vasitə kimi vəsaitlərin internetə qoşulmayan fiziki daşıyıcılarda saxlanıldığı “soyuq saxlama” (cold storage) üsulundan da istifadə edilə bilər.
2026-cı il sentyabrın 1-də “Rəqəmsal valyutalar və rəqəmsal hüquqlar haqqında” qanunun qüvvəyə minməsi və Rusiyada xüsusi kriptoinfrastrukturun formalaşdırılması fonunda bazar iştirakçıları Rusiya Bankından informasiya təhlükəsizliyi ilə bağlı xüsusi tələblər gözləyirlər.
“Finam”ın broker biznesi üzrə baş direktorunun müavini Dmitri Lesnov vurğulayıb ki, belə layihələrin mümkün qədər tez hazırlanması vacibdir. Onun sözlərinə görə, bu, bazar iştirakçılarına öz sistemlərini yeni tələblərə uyğunlaşdırmaq üçün kifayət qədər vaxt verəcək.
Yeni qanun ölkə daxilində tənzimlənən infrastruktur yaratmaqla yanaşı, rəqəmsal aktivlərlə əməliyyatları Rusiya Bankının nəzarəti altına keçirir. Sənədə əsasən, kriptovalyuta əmlak kimi tanınır, lakin xarici iqtisadi fəaliyyət (XİF) üzrə əqdlər istisna olmaqla, ondan ödəniş vasitəsi kimi istifadə qadağan edilir.
Rəqəmsal aktivlərlə bütün əməliyyatlar rəsmi vasitəçilər üzərindən həyata keçirilməlidir. Bundan əlavə, kriptovalyutanı Rusiya qanunvericiliyinə uyğun olaraq buraxılan qiymətli kağızlarla dəyişmək mümkün olacaq.
Kriptovalyuta bazarında baş verən dəyişikliklərlə bağlı daha ətraflı məlumat “Frank Media”nın materialında yer alıb.
MONETAR.AZ
