“Deutsche Telekom”, “Orange”, “Vodafone” və “Telefonica” Avropa İttifaqının peyk tezlik spektrinə birgə iddia irəli sürmək və mobil cihazlara birbaşa peyk bağlantısı xidmətləri göstərmək üçün konsorsium yaratmaq imkanını müzakirə edirlər. “Bloomberg”in məlumatına görə, belə bir təşəbbüs İlon Maskın “Starlink” xidmətinə Avropada yerli rəqibin yaranmasına səbəb ola bilər.
Məlumata görə, dörd operator Aİ-nin avropalı operator üçün rezervdə saxlamağı təklif etdiyi 2 QHs tezlik diapazonunun bir hissəsinə birgə iddia irəli sürmək imkanını nəzərdən keçirir. Brüssel bu addımla Avropanın suveren peyk rabitəsi imkanlarını gücləndirməyi və strateji infrastruktur sahəsində ABŞ texnologiyalarından asılılığı azaltmağı hədəfləyir.
Bununla belə, konsorsiumun yaradılması və ya tezliklərə birgə müraciətin təqdim olunması ilə bağlı hələ yekun qərar qəbul edilməyib.
Təşəbbüs Aİ-nin mobil peyk xidmətləri üçün 2 QHs diapazonundan istifadəyə dair yeni qaydalar hazırladığı bir vaxta təsadüf edir. Təklif olunan qaydalara əsasən, spektrin üçdə biri Avropanın yerli operatoru üçün rezervdə saxlanılacaq, digər üçdə biri Aİ-nin IRIS² proqramı çərçivəsində suveren rabitə xidmətlərinə ayrılacaq. Qalan üçdə bir hissəyə isə beynəlxalq şirkətlər iddia edə biləcəklər. Mövcud lisenziyaların müddətinin 2027-ci ildə başa çatması gözlənilir.
Potensial konsorsium Avropanın ən iri mobil operatorlarına “Starlink”in artıq möhkəm mövqeyə malik olduğu peykdən mobil cihazlara birbaşa bağlantı bazarında daha fəal rəqabət aparmaq imkanı verə bilər. “Starlink” Avropanın böyük hissəsində peyk vasitəsilə genişzolaqlı internet xidməti göstərir və mobil cihazlara birbaşa bağlantı xidmətlərini inkişaf etdirmək üçün bir sıra Avropa telekommunikasiya operatorları ilə əməkdaşlıq edir.
“Deutsche Telekom” artıq 2028-ci ildə istifadəyə verilməsi planlaşdırılan “Starlink” xidməti ilə əməkdaşlıq edir. Bu layihə bir neçə Avropa bazarında mobil cihazların birbaşa peyklərə qoşulmasını təmin etməyi nəzərdə tutur. Xidmət yerüstü mobil şəbəkənin əhatə etmədiyi ərazilərdə uyğun smartfonların peyklərlə birbaşa əlaqə yaratmasına imkan verməlidir.
“Vodafone” isə mobil cihazlara birbaşa peyk bağlantısı təmin edən ABŞ şirkəti “AST SpaceMobile” ilə 50/50 nisbətində birgə müəssisəyə malikdir. “Bloomberg”in məlumatına görə, Aİ-nin müzakirə etdiyi qaydalar qüvvəyə minərsə, “Vodafone” Avropa operatoru üçün nəzərdə tutulan tezliklərə iddia etmək üçün bu mülkiyyət strukturunu dəyişməli ola bilər.
Aİ-nin daha geniş peyk strategiyasının əsas elementlərindən biri “SES”, “Eutelsat” və “Hispasat”ın rəhbərlik etdiyi çoxorbitli IRIS² peyk sistemidir. Sistemə 2029-cu ildə xidmətə başlanması planlaşdırılır və ilkin mərhələdə əsas diqqətin genişzolaqlı internet xidmətlərinə yönəldilməsi gözlənilir.
Brüsselin bu təşəbbüsləri Avropa daxilində strateji rabitə infrastrukturu yaratmaq, peyk rabitəsi imkanlarını gücləndirmək və xarici texnologiya təchizatçılarından asılılığı azaltmaq məqsədinin bir hissəsidir.
MONETAR.AZ
