“Volkswagen AG” genişmiqyaslı aktiv portfelinin nəzərdən keçirilməsi çərçivəsində İtaliyanın məşhur motosiklet istehsalçısı “Ducati”nin satılması imkanını qiymətləndirir. “Bloomberg”in “Audi”nin baş icraçı direktoru Gernot Döllnerə istinadən yaydığı məlumata görə, “Ducati” konsernin qiymətləndirdiyi təxminən 2 000 biznesdən 600-nün sırasındadır.
Bolonya şəhərində yerləşən və “Panigale” kimi yüksək məhsuldarlıqlı motosikletləri ilə tanınan “Ducati” 2012-ci ildə “Volkswagen” tərəfindən alınaraq “Audi” qrupunun tərkibinə daxil edilib. Döllner bildirib ki, “Ducati” də qiymətləndirmə prosesinin bir hissəsidir, lakin şirkətin satılması ilə bağlı hələ heç bir qərar qəbul edilməyib.
“Bloomberg Intelligence” analitiki Maykl Dinin hesablamalarına görə, analoji şirkətlərin bazar qiymətləndirmələri əsasında “Ducati” təxminən 1,25 milyard avroya satıla bilər.
Mümkün satış Avropanın ən böyük avtomobil istehsalçısının geniş biznes portfelini optimallaşdırmaq və strukturunu sadələşdirmək istiqamətində atdığı daha geniş addımların bir hissəsidir. “Volkswagen”in Müşahidə Şurası ötən həftə qrupun aktivlərinin təxminən üçdə birinin azaldılmasını nəzərdə tutan yenidənqurma planını təsdiqləyib.
Bununla belə, “Ducati” ilə yolların ayrılması “Volkswagen” üçün asan qərar olmaya bilər. Brend 2020-ci ildən etibarən “MotoGP” üzrə ardıcıl altı konstruktorlar çempionluğu qazanıb və “Ducatisti” adlandırılan müştəriləri arasında yüksək səviyyədə loyallığa malikdir. Bundan əlavə, “Ducati” “Volkswagen”ə nəzarət edən Porsche-Piëch ailəsi üçün də xüsusi əhəmiyyət daşıyır. Şirkətin alınmasını mərhum Ferdinand Piëch şəxsən dəstəkləmişdi.
“Ducati”nin fəaliyyət marjası “Volkswagen”in baş icraçı direktoru Oliver Blume tərəfindən 2030-cu il üçün bütün qrup üzrə müəyyən edilmiş 9%-lik hədəfdən aşağıdır. Şirkət ildə təxminən 50 min motosiklet satır. Ötən il “Ducati” 925 milyon avro gəlir əldə edib və 52 milyon avro əməliyyat mənfəəti açıqlayıb.
“Volkswagen” 2017-ci ildə də “Ducati”nin satışını nəzərdən keçirmişdi. Lakin Almaniyada əmək kollektivlərinin nümayəndələrinin müqaviməti səbəbindən prosesdən imtina edilmişdi.
MONETAR.AZ
