Alman şirkətləri Çin biznesinin artan rəqabət təzyiqi ilə üzləşirlər. Almaniya Ticarət və Sənaye Palatalarının (DIHK) açıqladığı araşdırmaya görə, sorğuda iştirak edən şirkətlərin təxminən üçdə ikisi Çin rəqiblərinin təzyiqini hiss edir. Sənaye müəssisələri arasında bu göstərici 83%-ə çatır.
Araşdırmada 1 300 şirkət iştirak edib. DIHK-nin xarici ticarət şöbəsinin rəhbəri Volker Trayer bildirib ki, Çinlə rəqabət yeni mərhələyə qədəm qoyub.
“Çin şirkətləri artıq təkcə istehsal həcmi və qiymət üzrə rəqabət aparmırlar. Onlar texnoloji baxımdan güclü və innovativdirlər, eyni zamanda beynəlxalq bazarlarda getdikcə daha fəal mövqe tuturlar”, – deyə Trayer bildirib.
Araşdırmaya əsasən, şirkətlərin 88%-i fəaliyyət göstərdikləri biznes sahəsindən çıxmağı planlaşdırmır. Bunun əvəzinə, 60%-i məhsul innovasiyalarına diqqəti artırmağı, 50%-i xərcləri azaltmağı, 39%-i isə yeni bazarlara çıxmağı planlaşdırır. Demək olar ki, hər üç şirkətdən biri Çin tərəfdaşları ilə əməkdaşlığı genişləndirmək imkanlarını nəzərdən keçirir.
Almaniyanın Çinlə ticarət kəsiri ötən il təxminən 22 milyard avro artaraq 89,3 milyard avroya (103,61 milyard dollar) çatıb. Bu dövrdə Almaniyaya Çindən idxal 8,8% artdığı halda, ixrac 9,7% azalıb.
MONETAR.AZ
