Microsoftun karbon emissiyaları 2025-ci ildə 25% artaraq 20 milyon metrik ton karbon qazı ekvivalentinə çatıb. MONETAR.AZ xəbər verir ki, bu barədə şirkətin illik davamlılıq hesabatında bildirilib.
Məlumata görə, emissiyaların artmasına əsas səbəb süni intellekt üçün yeni məlumat mərkəzlərinə (data mərkəzləri) yatırımların genişlənməsi və əvvəllər həyata keçirilən bəzi bərpa olunan enerji kreditlərinin alınmasının dayandırılması olub.
Beləliklə, Microsoft emissiyaların azaldılması hədəflərində geriləmə yaşayan texnologiya şirkətləri sırasına qoşulub.
Şirkətin prezidenti Bred Smit və davamlılıq üzrə rəhbəri Melani Nakaqava hesabatda bildiriblər ki, süni intellekt infrastrukturunun inkişafı enerji, su, torpaq və digər resurslara tələbatı artırır, lakin davamlı həllər bu artan ehtiyacları eyni sürətlə qarşılaya bilmir.
Bu çərçivədə Microsoft iyun ayında ABŞ-ın Texas ştatında tikilməsi planlaşdırılan iri təbii qaz elektrik stansiyasından enerji təminatı ilə bağlı Chevron şirkəti ilə əməkdaşlıq sazişi imzalayıb. Həmin enerjidən yeni məlumat mərkəzi kompleksində istifadə olunması nəzərdə tutulur.
Bundan başqa, şirkət karbon emissiyalarının kompensasiyası strategiyasını yenidən nəzərdən keçirdiyini, yeni karbon saxlanması layihələri üzrə bəzi tərəfdaşlıqlardan geri çəkiləcəyini açıqlayıb. Həmçinin məlumat mərkəzlərinin saatlıq elektrik istehlakının tam şəkildə bərpa olunan enerji ilə təmin olunmasını nəzərdə tutan planın da yenidən qiymətləndirildiyi bildirilib.
