“Dünya Xoşbəxtlik Hesabatı”na əsasən 147 ölkədə insanların həyatlarından məmnunluq səviyyəsi qiymətləndirilib. Tədqiqat çərçivəsində respondentlərdən öz həyatlarını 10 ballıq şkala üzrə dəyərləndirmək xahiş olunub və 2023–2025-ci illərin orta nəticələri əsasında reytinq tərtib edilib.
Hesabata əsasən, dünyanın ən xoşbəxt ölkəsi Finlandiya olub. Bu ölkəni İslandiya və Danimarka izləyir. Ən aşağı göstəricilər isə Malavi, Syerra Leone və Əfqanıstan sakinləri arasında qeydə alınıb.
Reytinqdə Amerika Birləşmiş Ştatları 23-cü yerdə qərarlaşıb və Səudiyyə Ərəbistanı ilə Polşa arasında mövqe tutur.
Hesabatda qeyd olunur ki, insanların həyat məmnuniyyətinə sosial dəstək, gəlir səviyyəsi, fiziki və psixi sağlamlıq, seçim azadlığı və cəmiyyətə inam kimi amillər müsbət təsir göstərir. Əksinə, tənhalıq, iqtisadi qeyri-sabitlik, işsizlik, sosial bərabərsizlik və zəif psixi sağlamlıq göstəriciləri xoşbəxtlik səviyyəsini aşağı salır.
Bundan əlavə, xüsusilə gənclər arasında sosial mediadan həddindən artıq istifadə də rifah səviyyəsinin azalmasına təsir edən yeni risk faktoru kimi qiymətləndirilir.
Mütəxəssislər hesab edir ki, daha inklüziv və balanslı inkişaf siyasəti insanların ümumi rifahının artırılmasında mühüm rol oynayır.
MONETAR.AZ
