Respublika Təcili və Təxirəsalınmaz Tibbi Yardım Mərkəzi tibbi personal üçün vizual identifikasiya vasitələri və stasionar təminat elementlərinin alınması üzrə tender elan edib. Satınalmanın ümumi dəyəri 249,9 min manat təşkil edir. Ümumilikdə 17 500 ədəd geyim və avadanlıq əldə olunacaq.
Tender şərtlərinə əsasən, geniş çeşiddə məhsulların alınması nəzərdə tutulur. Buraya tibb işçiləri üçün funksional forma, əks etdirici elementləri olan qoruyucu jiletlər, yüngül xüsusi geyimlər, eləcə də tibbi avadanlıqlar üçün daşına bilən konteynerlər daxildir. Bundan əlavə, ortopedik döşəklər, qoruyucu örtüklər və sanitar və dispetçerlər üçün geyim dəstləri də satın alınacaq.
Məhsulların keyfiyyətinə və funksionallığına xüsusi diqqət yetirilir. Geyimlər aşınmaya davamlı, suya davamlı materiallardan hazırlanmalı, işıq əks etdirən elementlərə və rahat saxlama sistemlərinə malik olmalıdır. Tibb işçiləri üçün geyimlər personalın kateqoriyasına uyğun fərqli dizaynlarda nəzərdə tutulur. Həkimlər, sürücülər, tibb bacıları və sanitarlar üçün ayrı formalar olacaq.
Qeyd edək ki, tender 9 aprel 2026-cı ildə elan edilib. Təkliflərin qəbulu 1 may tarixinədək davam edəcək və həmin gün təqdim olunan təkliflər açılacaq.
