“Volkswagen AG” Almaniyada zavodların bağlanması və kütləvi işçi ixtisarlarını nəzərdən keçirməsi fonunda həmkarlar ittifaqlarının sərt müqaviməti ilə üzləşib. Qarşıdurma şirkətin Müşahidə Şurasının növbəti iclası zamanı daha da kəskin xarakter alıb.
Almaniyanın ən böyük sənaye həmkarlar ittifaqı olan “IG Metall”ın rəhbəri Kristiane Benner bildirib ki, işçilər planlaşdırılan ixtisarlara razı olmayacaqlar. “Bu, direktorlar şurasına açıq mesajdır: Biz birlikdə olduğumuz müddətdə buna imkan verməyəcəyik. İşçilər artıq öz üzərlərinə düşən yükü daşıyıblar”, — deyə Benner vurğulayıb.
Şirkət son dövrlər əsas bazarı hesab olunan Çində mənfəət marjasının azalması, yüksək istehsal xərcləri və qlobal rəqabətin güclənməsi səbəbindən xərclərin optimallaşdırılması və əməliyyat səmərəliliyinin artırılması istiqamətində tədbirlər hazırlayır.
Baş icraçı direktor (CEO) Oliver Blume və şirkət rəhbərliyi, xüsusilə enerji və əmək xərclərinin yüksək olduğu Almaniyadakı istehsal müəssisələrinin rəqabət qabiliyyətinin artırılmasının vacibliyini vurğulayırlar.
Şirkətin yaydığı açıqlamada qeyd olunub ki, rəhbərlik və Müşahidə Şurası qrupun uzunmüddətli perspektivləri ilə bağlı narahatlıqları bölüşür və “Volkswagen” qrupunun bütün brendlərini və bölmələrini daha çevik, dayanıqlı və rəqabətədavamlı etmək məqsədilə genişmiqyaslı transformasiya proqramı üzərində çalışır.
Etiraz aksiyaları çərçivəsində “IG Metall” Almaniyanın müxtəlif bölgələrində, o cümlədən Ştutqart və İnqolştadt şəhərlərində yerləşən müəssisələrdə nümayişlər təşkil edib. Həmin şəhərlərdə “Porsche” və “Audi” brendlərinin əsas istehsal və idarəetmə mərkəzləri fəaliyyət göstərir. Bu markalar da Çində tələbin zəifləməsi və beynəlxalq ticarət məhdudiyyətləri fonunda satış təzyiqləri ilə üzləşirlər.
“Der Spiegel” nəşrinin yaydığı məlumata əsasən, şirkətin daxili planında 2031–2034-cü illər ərzində dörd zavodun fəaliyyətinin dayandırılması nəzərdə tutulur. Bağlanması müzakirə olunan müəssisələr arasında “Audi”nin Nekkarzulm (Neckarsulm) zavodu da yer alır.
Bundan əvvəl “Manager Magazin” jurnalı “Volkswagen” qrupunun Almaniyada 100 minədək iş yerini ixtisar etməyi və dörd zavodu bağlamağı nəzərdən keçirdiyini bildirmişdi. Reallaşacağı təqdirdə bu addımlar şirkətin tarixində həyata keçirilən ən iri restrukturizasiya proqramlarından biri olacaq.
MONETAR.AZ
