ABŞ-ın kənd təsərrüfatı məhsullarına xarici tələbat avqustun ortalarında artım nümayiş etdirib. ABŞ Kənd Təsərrüfatı Nazirliyinin (USDA) məlumatına görə, avqustun 13-də başa çatan həftə ərzində xüsusilə yeni məhsul üzrə qarğıdalı və soya satışlarında ciddi artım qeydə alınıb.
Hesabat dövründə qarğıdalı üzrə xalis ixrac öhdəlikləri 1,05 milyon ton artıb. Bunun 816,1 min tonu növbəti marketinq ili üçün nəzərdə tutulub. Nəticədə ABŞ qarğıdalısının ümumi ixrac öhdəlikləri 87,74 milyon tona yüksəlib. Bu göstərici ötən ilin eyni dövründəki 70,49 milyon tondan xeyli yüksəkdir.
Soya ixracında da yeni məhsula maraq güclənib. Həftə ərzində xalis öhdəliklər 1,81 milyon ton artıb və bunun 1,72 milyon tonu növbəti marketinq ilinin payına düşüb. Bununla belə, ümumi öhdəliklər 41,87 milyon ton olmaqla ötən ilki 51 milyon ton göstəricisindən aşağı qalıb.
Buğda ixracı üzrə xalis öhdəliklər həftə ərzində 393,7 min ton artıb. Lakin ümumi öhdəliklərin həcmi 7,87 milyon ton təşkil edib ki, bu da bir il əvvəlki 11,52 milyon tondan əhəmiyyətli dərəcədə aşağıdır.
Digər kənd təsərrüfatı məhsullarında da ixrac öhdəliklərinin artdığı müşahidə olunub. Soya jmıxı üzrə göstərici 478,8 min ton artaraq ümumilikdə 17,87 milyon tona çatıb. Ötən ilin müvafiq dövründə bu rəqəm 15,60 milyon ton olub.
ABŞ pambığı üzrə öhdəliklər 274,3 min ton, düyü üzrə 38,8 min ton artıb. Mal əti ixracı üzrə öhdəliklər 9,3 min ton, donuz əti üzrə isə 27,3 min ton yüksəlib. Soya yağı üzrə göstərici isə ciddi dəyişiklik göstərməyərək 1,2 min ton səviyyəsində qalıb.
Yeni məlumatlar treyderlərin ABŞ-ın taxıl bazarındakı vəziyyəti yenidən qiymətləndirdiyi bir vaxtda açıqlanıb. USDA-nın avqust hesabatında qarğıdalı və soya üzrə istehsal proqnozlarının artırılması bazarda təklif gözləntilərini yüksəldib. Bununla yanaşı, ixrac sifarişlərinin dinamikası ABŞ məhsullarına qlobal tələbin hansı istiqamətdə dəyişdiyini müəyyənləşdirən əsas amillərdən biri olaraq qalır.
MONETAR.AZ
