Qlobal şəkər bazarında qiymətlər Hindistanın rüsumsuz idxalla bağlı qərarından sonra geriləyib. ICE birjasında xam şəkər fyuçersləri bu gün 0,8% ucuzlaşaraq bir funt üçün 17,38 sentə enib.
Qiymət enişi bir gün əvvəl bazarın son bir ildən artıq dövrün ən yüksək səviyyələrindən birinə çatmasının ardından baş verib. Belə ki, cümə axşamı xam şəkər fyuçersləri 18,26 sent səviyyəsinə qədər yüksəlmişdi.
Qiymətlərə təzyiq göstərən əsas amil Hindistan hökumətinin 31 oktyabradək 1 milyon metrik ton xam şəkərin rüsumsuz idxalına icazə verməsi olub. Dünyanın ikinci ən böyük şəkər istehsalçısı olan ölkə bu addımla daxili bazarda bahalaşmanın qarşısını almağı hədəfləyir.
Bununla belə, qlobal bazarda təkliflə bağlı risklər qalmaqdadır. Analitiklər Avropada quraqlığın məhsuldarlığa mənfi təsir göstərdiyini, Braziliyada isə iyun ayında yağan intensiv yağışların şəkər istehsalını azaltdığını bildirirlər. Bundan əlavə, El-Ninyo hava hadisəsinin Asiyanın bir sıra bölgələrində quraqlıq riskini artıracağı gözlənilir.
Broker və bazar məsləhətçisi Maykl Makduqallın sözlərinə görə, şəkərin qiyməti 18 sent həddindən yuxarı möhkəmlənə bilmədiyi üçün investorlar yeni mövqelər tutmazdan əvvəl treyderlərin həftəlik hesabatını gözləməyə üstünlük verirlər.
Ağ şəkər fyuçersləri də ucuzlaşıb. Gün ərzində qiymətlər 0,5% azalaraq bir metrik ton üçün 537,70 ABŞ dollarına düşüb. Bir gün əvvəl isə bu müqavilələr 566,80 dollaradək yüksələrək 2025-ci ilin martından bəri ən yüksək səviyyəni görmüşdü.
MONETAR.AZ
