ABŞ Prezidenti Donald Tramp bu gün bildirib ki, fermerlərə və heyvandarlara ət məhsullarını müstəqil şəkildə emal etməyə imkan verilməsi istiqamətində addımlar atacaq. Bu təşəbbüs noyabrda keçiriləcək aralıq seçkilər ərəfəsində ölkədə mal ətinin qiymətlərini azaltmağa yönəlmiş növbəti tədbir kimi qiymətləndirilir.
Tramp sosial şəbəkədə paylaşımında ət emalı sektorunda “güclü monopoliyanı sındırmaq” məqsədilə hüquqi sənədlərin hazırlanmasına göstəriş verəcəyini yazıb. Bununla belə, prezidentin bu cür dəyişiklikləri birbaşa həyata keçirmək səlahiyyətinə malik olub-olmadığı hələ aydın deyil. Ehtimal olunan fərmanın praktiki nəticələri də hazırda məlum deyil.
ABŞ Kənd Təsərrüfatı naziri Bruk Rollins bildirib ki, bazar ertəsi bu istiqamətdə yeni açıqlamalar veriləcək. Onun sözlərinə görə, planlar arasında “emal sahəsində bürokratik maneələrin aradan qaldırılması” və heyvandarların məhsullarını öz ştatlarının hüdudlarından kənarda satmaq imkanlarının genişləndirilməsi də yer alacaq.
Trampın mal ətinin qiymətlərini azaltmağa çalışmasının əsas səbəblərindən biri yaşayış xərclərinin seçkilər ərəfəsində amerikalı seçicilərin gündəmində əsas məsələlərdən biri olaraq qalmasıdır. Administrasiya bunun üçün xaricdən mal əti idxalının artırılması və iri ət emalı şirkətlərinə qarşı antimonopoliya araşdırmasının aparılması da daxil olmaqla bir sıra variantları nəzərdən keçirir.
Bu həftə Tramp 1 sentyabr 2025-ci ildən qüvvədə olan üyüdülmüş mal əti idxalına tətbiq edilən tariflərin yumşaldılması barədə fərman imzalayıb. Qərar daxili istehsala zərər vuracağını bildirən bir sıra heyvandarlar və respublikaçıların tənqidi ilə qarşılanıb.
Cümə günü açıqlanan plan Tramp administrasiyasının kənd təsərrüfatı sektorunda, xüsusilə də ət emalı sahəsində bazarın yüksək səviyyədə cəmləşməsi problemini aradan qaldırmaq istiqamətində atdığı növbəti addımdır.
MONETAR.AZ
