Asiya valyutalarının əksəriyyəti həftə ərzində məhdud diapazonda dəyişib. ABŞ dolları isə son beş həftədə ilk dəfə həftəlik enişlə başa çatmağa hazırlaşır.
Dollar İndeksi (DXY) Bakı vaxtı ilə saat 07:57 radələrində 0,1% azalaraq 101,982 bəndə düşüb. Beləliklə, indeks həftəni 0,2% itki ilə yekunlaşdırmağa yönəlib. ABŞ-da inflyasiyanın gözləntilərdən yüksək olması əvvəlcə dolları 2025-ci ilin əvvəlindən bəri ən yüksək səviyyəyə qaldırsa da, sonradan valyuta mövqelərinin zəifləməsi ilə nəticələnib.
Yapon yeni əsasən sabit qalıb və həftəni 0,3% ucuzlaşma ilə başa vurmağa hazırlaşır. Çinin həm daxili, həm də dənizaşırı bazarlarda ticarət olunan yuanının məzənnəsində əhəmiyyətli dəyişiklik qeydə alınmayıb. Cənubi Koreya vonu isə 0,1% möhkəmlənib. Həftənin əvvəlində müşahidə olunan kəskin tərəddüdlərdən sonra valyutanın həftəlik artımının 0,2%-ə çatacağı gözlənilir.
Valyuta bazarlarında investorların diqqəti ABŞ istiqrazlarının gəlirliliyinə və Federal Ehtiyat Sisteminin (FED) gələcək faiz qərarlarına yönəlib. Bazar iştirakçıları FED sədri Kevin Uorşun Beynəlxalq Valyuta Fondunun (BVF) Banqkokda keçirilən tədbirində verəcəyi mesajları da izləyiblər.
CME FedWatch alətinin məlumatlarına əsasən, bazarlar bu ay faiz artımı ehtimalını təxminən 28%, dekabrda isə 66% səviyyəsində qiymətləndirirlər.
Hindistan rupisi həftə ərzində regionun ən yaxşı nəticə göstərən valyutalarından birinə çevrilib. USD/INR məzənnəsi 0,2% azalaraq bir dollar üçün 95 rupi həddindən aşağı düşüb. Ötən həftə 97 rupi səviyyəsinə yaxınlaşaraq tarixi minimumlara enən rupi cari həftəni 1,9%-lik möhkəmlənmə ilə başa vurmağa yaxındır.
Hindistan Ehtiyat Bankı (RBI) dollara spekulyativ tələbatı azaltmaq məqsədilə bir sıra tədbirlər həyata keçirib. Bu tədbirlərə bəzi valyuta törəmə əməliyyatları üzrə tələblərin sərtləşdirilməsi və dövlət neft şirkətlərinin dolları birbaşa mərkəzi bankdan ala bilməsi üçün xüsusi mexanizmin yaradılması daxildir.
Bununla belə, yeni qaydaların rupinin forvard bazarında likvidliyə mənfi təsir göstərdiyi bildirilir. Hedcinq xərclərinin artması və əməliyyat qaydaları ilə bağlı qeyri-müəyyənlik bazar iştirakçılarının fəaliyyətini çətinləşdirib. RBI sonradan yeni tələblərin bəzi müddəalarına dair əlavə izahatlar verib.
Avstraliya dolları ABŞ dollarına qarşı 0,3% bahalaşıb. Buna baxmayaraq, valyutanın həftəni 0,6% itki ilə başa vuracağı gözlənilir. Sinqapur dolları isə əsasən sabit qalıb və həftə ərzində kəskin dəyişiklik nümayiş etdirməyib.
Ümumilikdə, Asiya valyutalarının dinamikası ABŞ-ın pul siyasəti ilə bağlı gözləntilərdən, istiqraz gəlirliliyindən və region ölkələrinin mərkəzi banklarının müdaxilələrindən asılı olaraq formalaşır.
MONETAR.AZ
