Dünya mərkəzi bankları son illərdə qızıl ehtiyatlarını əhəmiyyətli dərəcədə artırıb. Son dörd ildə illik alış həcmi təxminən 1 000 tona çatıb. Mərkəzi bankların rekord sayda hissəsi isə bu il də qızıl alışını davam etdirməyi planlaşdırır.
Monetar.az xəbər verir ki, Dünya Qızıl Şurasının (World Gold Council) son sorğusuna əsasən, mərkəzi bankların 45%-i bu il qızıl ehtiyatlarını artırmaq niyyətindədir. Bu, sorğunun tarixində qeydə alınan ən yüksək göstəricidir.
Sorğuda iştirak edən mərkəzi bankların təxminən dörddə üçü qarşıdakı beş ildə dünya valyuta ehtiyatlarında ABŞ dollarının payının azalacağını gözləyir.
Qızılın bahalaşması da onun ümumi ehtiyatlardakı dəyərini artırıb. Bununla belə, mərkəzi banklar qiymətlər aşağı düşəndə də qızıl almağa davam ediblər. Bu isə alışların yalnız qiymət artımı ilə bağlı olmadığını göstərir.
Qızıl ehtiyatlarına marağın artmasında 2022-ci ildə Rusiyanın Qərb ölkələrində saxlanılan valyuta ehtiyatlarının dondurulması da mühüm amil hesab olunur. Bu hadisə digər ölkələr üçün xarici valyutada saxlanılan ehtiyatların siyasi qərarlardan asılı ola biləcəyini göstərdi.
Qızıl isə mərkəzi banklara öz nəzarətlərində olan fiziki aktiv saxlamaq imkanı verir. Bu səbəbdən Çin kimi ölkələr qızıl ehtiyatlarını artırmağa davam edir. Özbəkistanın ehtiyatlarında da qızılın payının 87%-ə çatdığı bildirilir.
ABŞ dolları beynəlxalq ticarətdə əsas valyuta olaraq qalır. Bununla belə, mərkəzi bankların qızıl alışını artırması qlobal ehtiyat sistemində dolların roluna və ona olan etimada münasibətin tədricən dəyişə biləcəyini göstərir.
