Dünyanın ən böyük kriptovalyutası olan Bitcoin gecə ticarəti zamanı 85 000 dollar həddinə yaxınlaşsa da, sonradan qazancını itirib. Bakı vaxtı ilə saat 10:14-ə olan məlumata görə, rəqəmsal aktiv 82 785,8 dollar səviyyəsində qərarlaşıb.
Üçüncü rübdə güclü dinamika nümayiş etdirən Bitcoin oktyabr ayında təzyiq altında qalıb. Kriptovalyuta son bir ay ərzində formalaşan dar qiymət diapazonunda ticarət olunmaqda davam edir.
Bitcoinin qiymətinə təzyiq göstərən əsas amillərdən biri texnologiya səhmlərində satışların güclənməsidir. Texnologiya və informasiya texnologiyaları şirkətlərinin maliyyə nəticələri ilə bağlı investor narahatlıqları fonunda Nasdaq 100 fyuçersləri 1,65% ucuzlaşıb. Mis qiymətlərindəki geriləmə də riskli aktivlərə marağın zəifləməsi ilə müşayiət olunub.
Kriptovalyutaların texnologiya sektorundakı aktivlərlə yüksək əlaqəli hərəkəti Bitkoinin də satış təzyiqi ilə üzləşməsinə səbəb olan amillərdən biri kimi qiymətləndirilir.
Bununla belə, Bitcoinin növbəti qiymət istiqaməti texnologiya səhmlərinin dinamikası, qlobal inflyasiya, mərkəzi bankların faiz qərarları və kriptovalyuta bazarına kapital axınlarından asılı olacaq. Hazırkı vəziyyətdə qiymətin dar diapazonda hərəkəti bazarda qeyri-müəyyənliyin davam etdiyini göstərir.
MONETAR.AZ
