Yaxın Şərqdə diplomatik gərginliyin qismən azalması qlobal maliyyə və əmtəə bazarlarında aktivliyi yenidən bərpa edir. "Bloomberg" agentliyinin məlumatına görə, rəsmi Tehranın ABŞ ilə aparılan sülh danışıqlarında “əhəmiyyətli irəliləyiş” əldə olunduğunu bəyan etməsindən sonra London Metal Birjasında (LME) mis və digər sənaye metallarının qiyməti kəskin yüksəlib.
Treyderlər və böyük investorlar hesab edirlər ki, Vaşinqton-Tehran xəttindəki müsbət dinamika Hörmüz boğazında (Strait of Hormuz) naviqasiya təhlükəsizliyini təmin edə bilər. Bu isə öz növbəsində qlobal logistika xərclərini azaldaraq inflyasiya təzyiqini zəiflədəcək və sənaye istehsalını stimullaşdıracaq.
Mis qlobal iqtisadiyyatın "sağlamlıq barometri" hesab olunur (iqtisadçılar ona tez-tez "Doktor Mis" deyirlər), çünki o, tikintidən tutmuş yaşıl enerji və elektromobil texnologiyalarına qədər hər yerdə tətbiq edilir. Anbar ehtiyatlarının son 3 ayın minimumunda olması fonunda gələn bu geosiyasi yumşalma siqnalı yaxın həftələrdə misin tonunun 14 000 dollar psixoloji həddini keçməsinə səbəb ola bilər. Tədarük zəncirinin qorxudan azad olması sənaye metallarına spekulyativ marağı daha da gücləndirir.
MONETAR.AZ
