Kriptovalyuta bazarının lideri Bitcoin son dövrlərin ən hərəkətsiz və sabit dövrlərindən birini yaşayır. Bloomberg agentliyinin rəsmi birja göstəricilərinə istinadən yaydığı məlumata görə, Bitcoin üzrə gözlənilən volatillik (qiymət dalğalanması kəskinliyi) son 9 ayın ən aşağı səviyyəsinə enib.
Bu durğunluğun əsas səbəbləri bazarda ticarət aktivliyinin kəskin zəifləməsi, spot ETF-lərdən kütləvi vəsait çıxarılması və spekulyativ "isti pulların" rəqəmsal aktivlərdən sürətlə inkişaf edən süni intellekt (AI) və yarımkeçirici sektoruna axmasıdır.
Kripto bazardakı vəziyyəti xarakterizə edən əsas statistik göstəricilər və rəqəmlər belədir:
-
Volatillik indeksi: Gözlənilən dəyişkənliyi ölçən Bitcoin Volmex Implied Volatility indeksi 36,11 bəndə düşərək, ötən ilin sentyabr ayından bəri ən aşağı həddi qeydə alıb.
-
Cari qiymət dinamikası: Volatilliyin bu dərəcədə azalması Bitcoin-un 80 000 dollar psixoloji səviyyəsindən yuxarı möhkəmlənməyə çalışdığı bir ərəfəyə təsadüf edir. Hazırda rəqəmsal aktiv təxminən 77 000 dollar ətrafında ticarət olunur ki, bu da ötən ilin oktyabr ayındakı 126 000 dollarlıq tarixi maksimumdan (ATH) təxminən 40% aşağıdır.
-
ETF-lərdən qaçış: May ayı ərzində ABŞ-da fəaliyyət göstərən rəsmi spot Bitcoin ETF-lərindən təxminən 1 milyard dollar həcmində kapital çıxarılıb. Bununla da son iki aydır davam edən institusional pul axını tamamilə dayanıb.
Bitcoin-də yaşanan bu durğunluq qlobal maliyyə bazarlarındakı ümumi yüksəliş dinamikası ilə tam bir ziddiyyət təşkil edir. ABŞ fond birjaları geosiyasi risklərin (İranla mümkün sülh razılaşması) zəifləməsi fonunda yeni rekordlar qırarkən, Asiya bazarları da sürətlə böyüyür.
Cənubi Koreya və Tayvanın birja indeksləri xüsusilə süni intellekt texnologiyaları və yüksək sürətli yaddaş çipi (HBM) istehsalçıları sektorundakı qlobal bum hesabına tarixi zirvələrini yeniləyir.
Orbit Markets şirkətinin həmtəsisçisi Kerolayn Moron da pərakəndə (retail) investorların artıq daha yüksək və sürətli gəlir imkanları təklif edən süni intellekt və texnologiya səhmlərinə üstünlük verdiyini və ETF-lərdən çıxışın bunu rəsmən sübut etdiyini bildirib.
Wave Digital Assets şirkətinin eksperti Raciv Sauni qeyd edir ki, Bitcoin-in dividend və ya faiz kimi özünün birbaşa fundamental gəlirliliyi yoxdur. Bu səbəbdən mövcud durğunluq dövründə iri fondlar, maynerlər və suveren investorlar fərqli bir maliyyə mühəndisliyinə əl atıblar.
Böyük oyunçular qiymətlərin kəskin hərəkət etməyəcəyinə mərc edərək kütləvi şəkildə opsion müqavilələri satırlar. Nəticədə, bazarda baş verən hər hansı qəfil və kəskin qiymət hərəkətləri bu opsion satıcıları tərəfindən dərhal kompensasiya və balanslaşdırılır. Bu amil isə Bitcoin üçün güclü və davamlı bir yüksəliş impulsunun (rallinin) formalaşmasını xeyli çətinləşdirir.
MONETAR.AZ
