“Mercedes-Benz” şirkəti 2026-cı ilin ikinci rübündə əsas avtomobil bölməsi üzrə satışların illik müqayisədə 8% azaldığını açıqlayıb. Alman avtomobil istehsalçısı bu azalmanı, əsasən, Çində güclənən rəqabətlə əlaqələndirib.
Şirkətin rəsmi məlumatına görə, aprel–iyun aylarında ümumilikdə 417 800 avtomobil müştərilərə təhvil verilib.
Ən böyük azalma Çində qeydə alınıb. Bu bazarda tədarüklər ötən ilin eyni dövrü ilə müqayisədə 30% azalıb. “Mercedes-Benz” bunu rəqabət mühitinin sərtləşməsi və yeni modellərin bazara çıxarılma qrafiki ilə izah edib.
Bununla yanaşı, ikinci rübdə ABŞ-da satışlar 10%, Avropada isə 4% artıb.
Minik avtomobilləri və furqonlar daxil olmaqla akkumulyatorlu elektromobillərin (BEV) satışları isə 50% artaraq 63 min ədədə yüksəlib.
Avropa avtomobil istehsalçıları dünyanın ən böyük avtomobil bazarı olan Çində yerli brendlərlə davam edən qiymət rəqabəti fonunda fəaliyyətlərini daha çətin şərtlər altında davam etdirirlər.
MONETAR.AZ
