Çikaqo Əmtəə Birjasında qarğıdalı fyuçersləri dünən ticarəti enişlə başa vurub. Treyderlər sessiyanın əvvəlində son bir ayın maksimum səviyyəsinə yüksələn qiymətlərdən sonra mənfəəti reallaşdırıblar. ABŞ-da kənd təsərrüfatı bitkiləri üçün istilik stresinin azalacağını göstərən yenilənmiş hava proqnozları da kotirovkalara əlavə təzyiq göstərib.
Qarğıdalı üzrə sentyabr fyuçers müqaviləsi sessiya ərzində bir buşel üçün 4,44-3/4 dollar səviyyəsinə yüksəlsə də, günü 8-3/4 sent ucuzlaşaraq 4,35 dollar səviyyəsində başa vurub. Dekabr müqaviləsi isə 8 sent enərək bir buşel üçün 4,56-1/4 dollara düşüb. Bununla da kontrakt sessiya ərzində qeydə alınmış və 3 iyundan bəri ən yüksək göstərici olan 4,65-3/4 dollar səviyyəsindən geri çəkilib.
Yenilənmiş hava proqnozları iyulun ortalarında ABŞ-ın Orta Qərb bölgəsində gözlənilən anomal istilərin intensivliyinin azalacağını göstərir. Bu isə qarğıdalının tozlanma mərhələsində istilik stresinə məruz qalacağı ilə bağlı narahatlıqları zəiflədib.
Eyni zamanda, ABŞ dollarının möhkəmlənməsi də taxıl bazarına mənfi təsir göstərib. Güclənən dollar Amerika mənşəli taxılın beynəlxalq bazarlarda rəqabət qabiliyyətini azaldaraq fyuçers qiymətlərinə təzyiq edib.
Çikaqo taxıl bazarı, ABŞ Prezidenti Donald Trampın İranla bağlı münaqişənin nizamlanmasına dair aralıq sazişin əldə olunduğunu bəyan etməsindən sonra neft fyuçerslərinin təxminən 5% bahalaşmasına isə məhdud reaksiya verib.
ABŞ Enerji İnformasiyası İdarəsinin (EIA) məlumatına əsasən, iyulun 3-də başa çatan həftə ərzində qarğıdalıdan etanol istehsalı sutkada 1,093 milyon barrel təşkil edib. Bu, əvvəlki həftə ilə müqayisədə sutkada 24 min barrel azdır.
Bununla yanaşı, ABŞ-da etanol ehtiyatları bir həftə ərzində 762 min barrel azalaraq 23,928 milyon barrelə düşüb. Bu göstərici cari ilin yanvar ayından bəri qeydə alınan ən aşağı səviyyədir.
MONETAR.AZ
