ABŞ Ədliyyə Nazirliyi Paramount Skydance–Warner Bros. sövdələşməsini təsdiqlədi

ABŞ Ədliyyə Nazirliyi Paramount Skydance–Warner Bros.

Qlobal media və əyləncə sənayesində tarixi yenilik baş verib. ABŞ Ədliyyə Nazirliyinin Antitrest İdarəsi "Paramount Skydance Corp" ilə "Warner Bros. Discovery Inc" arasında planlaşdırılan və ümumi dəyəri təxminən 110–111 milyard ABŞ dolları qiymətləndirilən nəhəng birləşmə müqaviləsini heç bir əlavə şərt (aktivlərin satılması və ya fəaliyyət məhdudiyyətləri) qoymadan təsdiqləyib. Politico nəşrinin insayder mənbələrə istinadən yaydığı bu xəbər dərhal fond birjalarına təsir edib və birjadankənar ticarətdə "Warner Bros."-un səhmləri 0,4%, "Paramount Skydance"-in səhmləri isə 3,8% bahalaşıb.

Aylarla davam edən ciddi antimonopoliya yoxlamalarından sonra federal tənzimləyicilər bu nəhəng inteqrasiyanın bazarda azad rəqabəti pozmadığı qənaətinə gəliblər. Heç bir şərt irəli sürülməməsi Paramount Skydance üçün böyük hüquqi qələbə hesab olunur və Hollivudun ən tanınmış brendlərini vahid dam altında birləşdirir.

Təsdiq ərəfəsində korporativ gərginlik pik həddə çatıb. Paramount Skydance rəsmi olaraq "Netflix" platformasını tənzimləyici orqanları və bazar iştirakçılarını bu sövdələşməyə qarşı qızışdırmaqda ittiham edib. Bu bəyanat rəqiblərin yeni yaranacaq nəhəngdən nə dərəcədə çəkindiyini nümayiş etdirir.

Sövdələşmə Vaşinqtonda birmənalı qarşılanmayıb. ABŞ senatoru Elizabeth Warren qərarı sərt tənqid edərək bunu amerikalılar üçün "pis xəbər" adlandırıb. O, sövdələşmənin "korrupsiya və təsir alveri" ilə dolu olduğunu iddia edərək ştatların baş prokurorlarını bu birləşməni yerli səviyyədə bloklamağa çağırıb.

Ənənəvi Hollivud studiyaları striminq nəhəngləri ilə rəqabət apara bilmək üçün miqyaslarını böyütmək (konsolidasiya) məcburiyyətindədirlər. Yeni şirkət Netflix və Disney-in hegemonluğuna birbaşa zərbə vura biləcək kontent istehsalı gücünə sahib olacaq.

Senator Uorrenin bəyanatında yer alan "Trampın komandasına yaxın milyarderlərin insanların nə izlədiyinə və bunun üçün nə qədər ödədiyinə nəzarət etməsi" ifadəsi, ABŞ-da media mülkiyyətinin və rəqəmsal yayım siyasətinin həm də ciddi bir siyasi təsir alətinə çevrildiyini təsdiqləyir. Ədliyyə Nazirliyinin qərarından sonra rəsmi bağlanma tarixləri açıqlanmasa da, ştat prokurorlarının mümkün məhkəmə iddiaları bu prosesi bir qədər də uzada bilər.

Əgər qalan regional və hüquqi prosedurlar problemsiz tamamlanarsa, bu 111 milyard dollarlıq sövdələşmə medianın rəqəmsallaşması dövründə ənənəvi studiya sisteminin striminq erasına verdiyi ən böyük institusional cavab olacaq.

MONETAR.AZ