Avropa şirkətləri ikinci rüb üzrə son illərin ən güclü maliyyə nəticələrindən birini göstərməyə hazırlaşır.
Monetar.az xəbər verir ki, STOXX 600 indeksinə daxil olan şirkətlərin ikinci rüb üzrə ümumi mənfəətinin illik müqayisədə 23,4 faiz artacağı gözlənilir.
Məlumata görə, nəticələrini açıqlayan 268 şirkətin 58,6 faizi analitiklərin gözləntilərini üstələyib. Bu göstərici 2012-ci ildən bəri qeydə alınan 54 faizlik orta göstəricidən yüksəkdir.
Mənfəət artımında enerji şirkətlərinin önə çıxacağı proqnozlaşdırılır. ABŞ-İran qarşıdurması fonunda neft qiymətlərinin yüksəlməsi sektorun mənfəətinin ötən ilin eyni dövrü ilə müqayisədə 2 dəfədən çox artmasına səbəb ola bilər.
Əsas xammal sektorunun da güclü nəticə göstərəcəyi gözlənilir. Bu sahədə mənfəətin təxminən 70 faiz artacağı proqnozlaşdırılır.
Enerji sektoru nəzərə alınmadıqda belə, STOXX 600 şirkətlərinin mənfəətinin 12,3 faiz artacağı gözlənilir. Bu isə Avropa şirkətlərindəki mənfəət artımının yalnız yüksək əmtəə qiymətləri ilə bağlı olmadığını göstərir.
Şirkətlərin satışlarında isə artımın daha məhdud olacağı bildirilir. STOXX 600 şirkətlərinin satışlarının illik müqayisədə 11,4 faiz artacağı proqnozlaşdırılır. Ötən həftə bu göstərici üzrə 12,6 faizlik artım gözlənilirdi.
