Ford Motor III rübdə ABŞ bazarında avtomobil satışlarının illik müqayisədə 6,6 faiz azaldığını açıqlayıb. Şirkət eyni zamanda sentyabrın sonunda F-150 pikaplarının istehsalına təsir edən qısamüddətli tədarük probleminin maliyyə nəticələrinin 2026-cı il üzrə 10-11 milyard dollar həcmində proqnozlaşdırılan EBIT göstəricisinə daxil olduğunu bildirib.
Şirkətin məlumatına görə, tədarükçü ilə bağlı problem alüminium çatışmazlığı ilə əlaqəli deyil. Gözlənilən maliyyə təsiri iyulun 28-də açıqlanan illik proqnoz çərçivəsində qalır.
Ford III rübdə ABŞ-da 509 764 avtomobil satıb. Satışlardakı azalmaya Escape və Corsair modellərinin istehsalının planlı şəkildə dayandırılması da təsir edib. Bu modellər nəzərə alınmadıqda, şirkətin satışlarının əsasən sabit qaldığı, ümumi bazarda isə azalmanın təxminən 1 faiz olduğu bildirilir.
Ford-un hesablamalarına əsasən, şirkətin ABŞ pərakəndə avtomobil bazarındakı payı 0,4 faiz bəndi artaraq 12,1 faizə yüksəlib.
Ford-un əsas satış istiqamətlərindən biri olan F-Series pikaplarına tələbat yüksək olaraq qalır. Sentyabrda bu model ailəsinin satışları 2,4 faiz artaraq 67 448 ədədə çatıb. İlin əvvəlindən F-Series üzrə satışlar 561 508 ədəd təşkil edib ki, bu da Chevrolet Silverado-nun göstəricisindən 140 mindən çox çoxdur.
III rübdə F-Series istehsalı 4,5 faiz artaraq 266 777 pikapa çatıb. Super Duty istehsalı isə 4,4 faiz yüksələrək 110 275 ədəd olub. Bu, son 19 ilin ən yüksək rüblük nəticəsi kimi qiymətləndirilir.
Hibrid və yolsuzluq modellərində də artım qeydə alınıb. Maverick Hybrid satışları 59,6 faiz artaraq 27 793 ədədə yüksəlib. Bronco modeli isə 38 020 ədəd satılaraq rüblük rekord müəyyənləşdirib. Explorer modelinin ilin əvvəlindən satışları 17,6 faiz artaraq 189 210 ədədə çatıb.
Ford-un Bronco, Raptor, Tremor və FX4 modellərindən ibarət yolsuzluq xətti ilin əvvəlindən şirkətin satışlarının 24 faizini təmin edib. Bu göstərici əvvəlki dövrlə müqayisədə 3,8 faiz bəndi artıb.
Şirkət rəqəmsal xidmətlər üzrə də artım açıqlayıb. Ford-un fəal ödənişli proqram təminatı abunəliklərinin sayı 1,7 milyonu keçib. Bu, ötən ilin eyni dövrü ilə müqayisədə 40 faizdən çox artım deməkdir.
MONETAR.AZ
