Özbəkistanın Dövlət Ekoloji Ekspertiza Mərkəzi Çarvak su anbarı ərazisində inşa ediləcək “Sea Breeze” kurortunun tikintisinin ilk mərhələsini təsdiqləyib. Bu barədə yerli KİV-lər məlumat yayıb.
Ekspertiza rəyi 10 fevral 2026-cı ildə verilib və 10 fevral 2029-cu ilədək qüvvədə olacaq.
“Sea Breeze Uzbekistan” layihəsi azərbaycanlı iş adamı Emin Ağalarov tərəfindən həyata keçirilir. O, layihənin konsepsiyasını 2024-cü ilin dekabrında Özbəkistan prezidenti Şavkat Mirziyoyevə təqdim edib.
Kurort kompleksi Çarvak su anbarının şərq sahilində Yakkatutu və Boladala qəsəbələri arasında yerləşən 577 hektar ərazini əhatə edəcək. Layihəyə 7 km uzunluğunda sahil xətti, hotellər, apartamentlər, villalar, çimərliklər, idman meydançaları, ictimai məkanlar, tibbi klaster və 2 min nəfərlik amfiteatr daxildir.
Tikinti işlərinin 10 il, 2035-ci ilə qədər davam etməsi planlaşdırılır. İlk mərhələ isə təxminən 100 hektar ərazini əhatə edəcək.
