"Morgan Stanley" hesab edir ki, "Volkswagen"in bu yaxınlarda açıqladığı "Gələcək Planı" şirkətin Çindən gələn rəqabət təzyiqinə cavab vermək üçün atdığı zəruri strateji addımdır. Bununla belə, analitiklər planın icrası ilə bağlı risklərin hələ də yüksək səviyyədə qaldığını bildirirlər.
Strategiyanın əsasını xərclərin azaldılması, istehsal güclərinin optimallaşdırılması və məhsul portfelinin sadələşdirilməsi hesabına şirkətin fəaliyyətinin daha səmərəli təşkil edilməsi təşkil edir. Plan çərçivəsində istehsal güclərinin azaldılması, model çeşidinin ixtisarı, komplektasiya variantlarının minimuma endirilməsi, eləcə də qərarların daha operativ qəbul edilməsi məqsədilə rəqəmsallaşma və süni intellekt texnologiyalarının tətbiqinin genişləndirilməsi nəzərdə tutulur.
Şirkət 2018-ci ildə qeydə alınmış təxminən 12 milyon avtomobillik istehsal potensialını 2030-cu ilədək 9 milyon səviyyəsinə endirməyi planlaşdırır. Eyni zamanda, rəhbərlik model sırasını 50%, avadanlıq konfiqurasiyalarının mürəkkəbliyini isə 75% azaltmağı hədəfləyir.
Restrukturizasiya proqramının mühüm istiqamətlərindən biri də aktiv portfelinin optimallaşdırılmasıdır. İyun ayında "Everllence" (keçmiş "MAN Energy Solutions") şirkətindəki payın satışından 7,4 milyard avro gəlir əldə edildikdən sonra, "Volkswagen" qeyri-əsas aktivlərin satışını davam etdirərək vəsaitləri əsas avtomobil biznesinin inkişafına yönəltməyi planlaşdırır. Şirkət, həmçinin ortaq xidmət modellərinin genişləndirilməsi, daha çevik idarəetmə strukturlarının yaradılması və süni intellekt əsaslı proseslərin tətbiqi hesabına əlavə qənaət imkanları görür.
"Morgan Stanley" analitiklərinin fikrincə, strategiya "Volkswagen"in Çin bazarında bazar payının azalması, artıq istehsal gücləri və yüksək kapital qoyuluşları kimi əsas struktur problemlərinin həllinə yönəlib. Bununla belə, həmkarlar ittifaqları və regional hakimiyyət orqanları ilə danışıqların davam etməsi planın icrasını ləngidə və ya onun miqyasını məhdudlaşdıra bilər.
Bank hesab edir ki, uzunmüddətli perspektivdə proqram şirkətin bazar dəyərini dəstəkləyə bilər. Bununla belə, yekun maliyyə nəticələri restrukturizasiya xərcləri ilə aktiv satışlarından əldə olunacaq gəlirlər arasındakı balansdan asılı olacaq.
"Morgan Stanley" "Volkswagen" səhmləri üzrə "Equal-weight" ("bazara bərabər") tövsiyəsini və 100 avro hədəf qiymətini dəyişməz saxlayıb. Analitiklər bildirirlər ki, şirkət hələ də Çində satışların zəifləməsi və Çin avtomobil istehsalçılarının qlobal bazarda güclənən rəqabəti səbəbindən ciddi təzyiqlərlə üzləşir.
