ABŞ-ın Strateji Neft Ehtiyatlarında xam neftin həcmi ötən həftə 282,7 milyon barrelə enib. Bu, 1982-ci ilin oktyabrından bəri qeydə alınan ən aşağı göstəricidir.
Reuters agentliyinin ABŞ Energetika Nazirliyinin statistikasına istinadən yaydığı məlumata görə, ehtiyatların azalması Vaşinqtonun daxili yanacaq bazarında qiymət artımını və inflyasiya təzyiqini məhdudlaşdırmaq məqsədilə strateji ehtiyatlardan istifadə etməsi ilə əlaqələndirilir.
Yaxın Şərqdə gərginliyin artması və neft tədarükü ilə bağlı risklər ABŞ-ın strateji ehtiyatlarının əhəmiyyətini yenidən gündəmə gətirib. Təqdim olunan məlumata əsasən, mart ayında Hörmüz boğazında yaranan böhrandan sonra ABŞ Prezidenti Donald Trampın administrasiyası Beynəlxalq Enerji Agentliyinə (IEA) üzv ölkələrlə birlikdə bazara 172 milyon barrel fövqəladə neft çıxarılması barədə razılaşmaya nail olub.
Sentyabrın sonunda Səudiyyə Ərəbistanının Yanbu və Şeybə bölgələrindəki neft obyektlərinə hücumlar və Brent markalı neftin bir barel üçün 110 dolları keçməsi fonunda ABŞ administrasiyası daxili neft emalı zavodlarına strateji ehtiyatlardan əlavə 40 milyon barrel nefti borc əsasında götürməyi təklif edib. Bu təşəbbüsün məqsədi tədarükdə yaranan çətinliklərin təsirini müvəqqəti azaltmaqdır.
Strateji Neft Ehtiyatlarının 282,7 milyon barrelə enməsi ABŞ-ın gələcək enerji və təchizat şoklarına qarşı istifadə edə biləcəyi buferi daraldır. Ehtiyatların yenidən artırılması isə neftin alış qiymətindən, bazardakı təklifdən və hökumətin maliyyələşdirmə imkanlarından asılı olacaq.
Enerji qiymətlərinin yüksəlməsi inflyasiya risklərini də gücləndirir. ABŞ-da istehlak qiymətlərinin artımı və Federal Ehtiyat Sisteminin (FED) faiz siyasəti ilə bağlı gözləntilər fonunda neft bazarındakı gərginlik pul-kredit siyasətinə əlavə təzyiq yarada bilər.
Beləliklə, strateji ehtiyatların azalması ABŞ-ın enerji təhlükəsizliyi baxımından mühüm göstəricidir. Neft tədarükündəki fasilələrin davam etməsi həm yanacaq qiymətlərinə, həm də inflyasiyanın dinamikasına təsir göstərə bilər.
MONETAR.AZ
