Vaar Energi (İtaliyanın Eni şirkətinin törəmə müəssisəsi) bugün Arktikadakı Goliat yatağında neft hasilatını artırmaq planlarını açıqlayıb. Layihə Equinor ilə birgə həyata keçiriləcək.
Şirkətlərin bəyanatına görə, layihəyə təxminən 360 milyon dollar sərmayə qoyulacaq. Məqsəd 2029-cu ildən etibarən hasilatı artırmaq və yatağın istismar müddətini təxminən 10 il uzadaraq 2050-ci ilə qədər çatdırmaqdır.
Layihə çərçivəsində Goliat yatağı yaxınlıqdakı Snoehvit qaz obyekti ilə boru kəməri vasitəsilə birləşdiriləcək. Bu, hazırda neft hasilatını məhdudlaşdıran böyük həcmdə təbii qazın çıxarılmasına imkan verəcək.
Eni bildirib ki, əlavə neft dərhal bazara çıxarılacaq, qaz isə Hammerfest şəhərində yerləşən LNG zavoduna ixrac ediləcək və emal imkanları yarandıqca satışa yönəldiləcək.
Qeyd edək ki, ötən il Goliat yatağında qaz hasilatı neftdən çox olub. Lakin qaz ixrac infrastrukturu olmadığından onun böyük hissəsi yenidən yatağa vurulurdu.
Norveç Neft Direktorluğunun məlumatına görə, 2025-ci ildə yataqda orta gündəlik neft hasilatı 22 min bareldən bir qədər çox olub.
Hazırda lisenziyanın 65%-i Vaar Energiyə, 35%-i isə Equinora məxsusdur.
MONETAR.AZ
