Son həftələrdə Çinin neft şirkətləri xammalı aqressiv şəkildə sataraq bir neçə ölkəyə tenderlər vasitəsilə böyük həcmdə neft realizə edib. Bu barədə enerji treyderi Mercuria Energy Group-un baş icraçı direktoru məlumat verib.
Mercuria rəhbəri Marco Dunand bildirib ki, son 2–3 həftə ərzində Çin şirkətləri “əslində aqressiv şəkildə xam neft satır”. Onun sözlərinə görə, onlar müxtəlif ölkələrdən gələn tələbin böyük hissəsini bağlayıblar və tenderlər vasitəsilə aktiv şəkildə neft təklif ediblər.
Dunanın fikrincə, bu satışların bir neçə mümkün səbəbi var: Çinin daxili neft ehtiyatlarının bazara çıxarılması, müharibənin ilk həftələrində İran neftinin davamlı satışı və həmçinin Hörmüz boğazının gözlənildiyindən daha tez açıla biləcəyi ilə bağlı optimist gözləntilər.
O əlavə edib ki, Mercuria bu il Çində benzin tələbinin elektrik avtomobillərinin geniş yayılması səbəbindən gündə 1 milyon barel azalacağını proqnozlaşdırır. Bu da neft satışlarını stimullaşdıran amillərdən biri ola bilər.
Dunanın sözlərinə görə, bu satış tendensiyası uzun müddət davam etməyə bilər: “Onların bunu nə qədər davam etdirə biləcəyi sual altındadır. Məncə, bu, təxminən daha üç həftə davam edə bilər, daha sonra mövqelərini yenidən nəzərdən keçirməli olacaqlar.”
MONETAR.AZ
