Türkiyə Respublikasının Mərkəzi Bankının Pul-Kredit Siyasəti Komitəsi 22 aprel tarixli iclasın yekunlarına əsasən əsas faiz dərəcəsini 37% səviyyəsində dəyişməz saxlayıb.
Tənzimləyici bu qərarı aprel ayında inflyasiyanın sürətlənməsi və Yaxın Şərqdəki müharibə fonunda enerji qiymətlərində müşahidə olunan dəyişkənliklə izah edib.
Komitə həmçinin gecəlik kreditlər üzrə faiz dərəcəsini 40%, gecəlik borc alma dərəcəsini isə 35,5% səviyyəsində saxlayıb.
Qurum qiymət sabitliyi təmin olunana qədər sərt pul-kredit siyasətini davam etdirmək niyyətində olduğunu bildirib. İnflyasiya üzrə hədəf göstərici olan 5% səviyyəsi uzun illərdir dəyişdirilmir.
Türkiyə Mərkəzi Bankının verdiyi siqnal kifayət qədər sərt qiymətləndirilir. Bildirilir ki, inflyasiya proqnozunda əhəmiyyətli və davamlı pisləşmə baş verərsə, o cümlədən son hadisələrin təsiri ilə, pul-kredit siyasəti daha da sərtləşdirilə bilər.
