Qazprom Baltik dənizində yerləşən “Portovaya” mayeləşdirilmiş təbii qaz (LNG) zavodundan Çinə ikinci partiyanı çatdırıb. Məlumat LSEG ticarət və gəmi izləmə sisteminin göstəricilərinə əsaslanır və Reuters tərəfindən yayımlanıb.
“Portovaya” zavodu 1,5 milyon ton illik istehsal gücünə malikdir və 2022-ci ilin sentyabrında fəaliyyətə başlayıb.
Zavoddan ixrac ABŞ-ın 2025-ci ilin yanvarında tətbiq etdiyi əlavə sanksiyalar səbəbindən dayanmışdı. Bu sanksiyalar Rusiyanın LNG istehsalı və ixrac imkanlarını məhdudlaşdırmaq və bu sahədən gəlirlərini azaltmaq məqsədi daşıyırdı.
Məlumata görə, “Valera” adlı LNG tankeri yanvarın 25-də “Portovaya” zavodundan yük götürüb və çərşənbə günü Çindəki Beihai terminalına çatdırıb. Bundan əvvəl də həmin zavoddan dekabr ayında sanksiyalardan sonrakı ilk partiya göndərilmişdi.
Eyni zamanda, sanksiya altına düşən digər Rusiya LNG layihəsi — “Arctic LNG-2” də Beihai terminalına qaz tədarük edir.
Qeyd olunur ki, sanksiyalardan əvvəl “Portovaya” ayda təxminən iki partiya ixrac edirdi. 2025-ci ilin martından etibarən zavod həm Çinə iki partiya, həm də Kalininqrada ayda bir partiya göndərir.
MONETAR.AZ
