Azərbaycan Avtomobil Yolları Dövlət Agentliyi Bakıda nasaz vəziyyətdə olan eskalatorların genişmiqyaslı təmirinə başladığını açıqlayıb. Qurum bu barədə sorğuya cavab olaraq məlumat verib.
Uzun illərdir paytaxtın müxtəlif yerlərində – yeraltı və yerüstü piyada keçidlərində quraşdırılmış eskalatorların bir hissəsi işləmir ki, bu da sakinlərin hərəkətini xeyli çətinləşdirir. Xüsusilə Azərbaycan Mərkəzi Bankı qarşısındakı yeraltı keçiddə eskalatorlar uzun müddətdir fəaliyyət göstərmir.
Bundan başqa, oxşar problemlər şəhərin digər hissələrində də müşahidə olunur. Məsələn, Azneft meydanı ətrafındakı keçidlərdə, Sahil metrostansiyası yaxınlığında və Heydər Əliyev Sarayı ətrafında eskalatorlar tez-tez işlək vəziyyətdə olmur.
Agentlikdən bildirilib ki, hazırda mütəxəssislər yeraltı və yerüstü piyada keçidlərindəki nasaz eskalator və liftlərin təmiri ilə məşğuldurlar. Texniki baxışlar zamanı bəzi avadanlıqlarda mexaniki nasazlıqlar və köhnəlmiş hissələr aşkarlanıb və buna görə bərpa işlərinə start verilib.
Artıq bəzi ərazilərdə təmir yekunlaşıb və eskalatorlar tam işlək vəziyyətə gətirilərək istifadəyə verilib. Digər keçidlərdə isə işlər mərhələli şəkildə davam edir. Qeyd olunub ki, ehtiyat hissələrinin xaricdən sifariş olunması səbəbindən bəzi qurğuların bərpası daha çox vaxt tələb edir.
Məlumata görə, “Bakı şəhəri və ətraf ərazilərdə nəqliyyat infrastrukturunun təkmilləşdirilməsi üzrə 2025–2030-cu illər üçün Dövlət Proqramı” çərçivəsində şəhərdəki bütün piyada keçidlərində eskalatorların vəziyyəti geniş şəkildə monitorinq olunur. Bu monitorinqin nəticələrinə əsasən, hər bir keçidin texniki vəziyyəti qiymətləndirilir və eskalatorların yenilənməsi, dəyişdirilməsi, həmçinin texniki xidmətin keyfiyyətinin artırılması ilə bağlı təkliflər hazırlanır.
