ABŞ Silahlı Qüvvələrinin Mərkəzi Komandanlığı bildirib ki, Donald Tramp administrasiyasının elan etdiyi İranın dəniz blokadası artıq praktik olaraq tətbiq olunmağa başlayıb. İlk günün nəticələrinə görə, ABŞ hərbçiləri altı kommersiya gəmisini geri dönərək İran limanlarına qayıtmağa məcbur edib.
Blokadanın təmin edilməsi üçün ABŞ regionda genişmiqyaslı hərbi qüvvə yerləşdirib: əməliyyatda ondan çox döyüş gəmisi və təxminən 10 min hərbçi iştirak edir.
ABŞ hərbçiləri “uzaqdan qarşısını alma” taktikasından istifadə edir. Sərt nəzarət zonası boğazın ən dar hissəsində deyil, onun çıxışında — Oman körfəzi və Ərəb dənizi sularında yaradılıb. Bu yanaşma gəmilərin boğazı keçməsinə texniki imkan versə də, onların açıq okeana çıxışını məhdudlaşdırır.
Hadisənin əsas diqqət çəkən məqamı Rich Starry tankerinin blokadanı yarmaq cəhdi olub. Çin strukturları ilə əlaqəli bu gəmi 2023-cü ildən İran neftinin “kölgə ixracı”nda iştirakına görə ABŞ sanksiyalarına məruz qalıb.
Məlumata görə, tanker səhər saatlarında boğazı keçə bilib, lakin Oman körfəzinə daxil olduqdan sonra — ABŞ Hərbi Dəniz Qüvvələrinin patrul zonasına çatdıqda geri dönərək istiqamətini dəyişib.
Oxşar vəziyyət Elpis tankerində də qeydə alınıb: o da blokada başladığı anda boğaza daxil olub, lakin sonradan hərəkətini dayandıraraq geri qayıdıb. Ümumilikdə həmin gün boğazdan hər iki istiqamətdə cəmi beş gəmi keçib.
Ekspertlər qeyd edir ki, əsas sual artıq gəmilərin fiziki olaraq boğazdan keçə bilməsi deyil, ABŞ hərbi qüvvələrinin hansı səviyyədə və harada güc tətbiq edəcəyidir.
MONETAR.AZ
