Azərbaycan Mərkəzi Bankı (AMB) ölkə vətəndaşlarının xarici investisiya platformalarına cəlb olunması ilə bağlı xəbərdarlıq yayıb.
AMB-nin apardığı monitorinqlər nəticəsində bəzi xarici investisiya platformalarının Azərbaycanda müxtəlif kanallar vasitəsilə təşviq edildiyi və ölkə rezidentlərinə investisiya xidmətləri təklif etdiyi müəyyənləşdirilib.
AMB-dən AZƏRTAC-a bildirilib ki, bu platformaların tanıdılması internet saytları, sosial media hesabları, müxtəlif təlim proqramları, seminarlar və digər marketinq alətləri vasitəsilə həyata keçirilir.
Mərkəzi Bank diqqətə çatdırıb ki, xarici ölkənin tənzimləyici qurumu tərəfindən verilmiş lisenziyanın olması həmin platformaya avtomatik olaraq Azərbaycanda investisiya xidməti göstərmək və ya bu xidmətləri reklam etmək hüququ vermir.
Azərbaycan qanunvericiliyinə əsasən, ölkə ərazisində investisiya xidmətlərinin göstərilməsi üçün Mərkəzi Bankın müvafiq lisenziyası tələb olunur. Buna görə də vətəndaşlara hər hansı investisiya xidmətindən istifadə etməzdən əvvəl xidmət təminatçısının Azərbaycanda fəaliyyət göstərmək üçün AMB tərəfindən verilmiş lisenziyaya sahib olub-olmadığını yoxlamaq tövsiyə edilir.
Tənzimləyici qurum investorların hüquqlarının qorunması baxımından investisiyaların yalnız AMB tərəfindən lisenziyalaşdırılmış investisiya şirkətlərinə etibar edilməsinin vacibliyini vurğulayıb.
Mərkəzi Bank tərəfindən lisenziya verilmiş investisiya şirkətlərinin aktual siyahısı qurumun rəsmi internet səhifəsində yerləşdirilib.
Beləliklə, xarici platformanın başqa ölkədə qanuni fəaliyyət göstərməsi onun Azərbaycanda avtomatik şəkildə investisiya xidməti göstərmək hüququna malik olması demək deyil. Vətəndaşlara investisiya yatırmazdan əvvəl platformanın ölkə daxilində hüquqi statusunu və lisenziyasını diqqətlə yoxlamaq tövsiyə olunur.
