Azərbaycandan qeyri-neft məhsullarının ixracı artmaqda davam edir. 2026-cı ilin yanvar-oktyabr aylarında qeyri-neft sektoru üzrə ixrac ötən ilin eyni dövrü ilə müqayisədə 20,8% artaraq 3,6 milyard dollara çatıb.
Monetar.az xəbər verir ki, bu barədə İqtisadi İslahatların Təhlili və Kommunikasiya Mərkəzinin (İİTKM) “İxrac icmalı”nın noyabr sayında açıqlanıb.
Məlumata görə, təkcə oktyabr ayında qeyri-neft ixracı illik müqayisədə 23% artaraq 414,2 milyon dollar təşkil edib.
Hesabat dövründə yeyinti məhsullarının ixracının dəyəri 115,2 milyon dollar, qeyri-yeyinti məhsullarının ixracı isə 280,7 milyon dollar olub. Qeyri-yeyinti məhsulları üzrə ixracda 29,9% artım qeydə alınıb.
Yanvar-oktyabr aylarında bəzi məhsulların ixracında daha yüksək artım müşahidə edilib. Belə ki, şəkər və şəkərdən hazırlanan qənnadı məmulatlarının ixracı 2,4 dəfə artıb. Alüminium və ondan hazırlanan məmulatların ixracında 39,2%, qara metallardan hazırlanan məmulatlarda 34%, bitki və heyvan mənşəli piylər və yağlarda 27,1%, mis və mis məmulatlarında isə 24,9% artım olub.
Eyni zamanda, üzvi kimyəvi birləşmələrin ixracı 16,1%, pambıq 14,2%, tərəvəzlər 11,6%, qəhvə və çay 10,9%, yeməli meyvələr isə 6,7% artıb.
Aqrar və aqrar-sənaye məhsullarının ixracında da müsbət dinamika qeydə alınıb. Belə ki, aqrar məhsulların ixracı 12,7% artaraq 866,9 milyon dollara, aqrar-sənaye məhsullarının ixracı isə 28,8% artaraq 334,9 milyon dollara yüksəlib.
Nəticədə, 2026-cı ilin ilk 10 ayında aqrar və aqrar-sənaye məhsullarının ümumi ixracı 16,7% artaraq 1,2 milyard dollar təşkil edib.
