2026-cı ilin yanvar-oktyabr aylarında Azərbaycanda emal sənayesinin strukturunda neft məhsullarının istehsalı ilk sırada qərarlaşıb.
Monetar.az xəbər verir ki, Dövlət Statistika Komitəsinin açıqladığı məlumatlara əsasən, hesabat dövründə neft məhsullarının istehsalının dəyəri 5 milyard 146,8 milyon manat olub. Bu, emal sənayesinin ümumi istehsalının 27,1 faizini təşkil edib.
Diqqətçəkən məqam odur ki, neft məhsullarının istehsalı qida sənayesini 767,1 milyon manat üstələyib. Belə ki, qida məhsullarının istehsalı 4 milyard 379,7 milyon manat, ümumi emal sənayesindəki payı isə 23,1 faiz təşkil edib.
Digər sahələr üzrə göstərici də kifayət qədər böyükdür. Belə ki, emal sənayesində 4 milyard 574,8 milyon manatlıq məhsul digər fəaliyyət sahələrinin payına düşüb. Bu, ümumi istehsalın 24 faizidir.
Komitənin məlumatına görə, kimya sənayesinin payı 7,7 faiz, tikinti materiallarının istehsalının payı 6,9 faiz olub. Tütün məmulatları və metallurgiya sənayesinin hər birinin payı isə 5,6 faiz təşkil edib.
Beləliklə, emal sənayesində istehsalın yarıdan çoxu neft məhsulları və qida sənayesinin payına düşüb. Maraqlıdır ki, digər fəaliyyət sahələrinin ümumi payı 24 faiz olmaqla qida sənayesinin göstəricisinə yaxınlaşıb.
Qeyd edək ki, 2026-cı ilin yanvar-oktyabr aylarında Azərbaycanda emal sənayesi üzrə ümumilikdə 18 milyard 995,1 milyon manatlıq məhsul istehsal edilib və sənaye xarakterli xidmətlər göstərilib. Bu, ötən ilin eyni dövrü ilə müqayisədə real ifadədə 2,7 faiz çoxdur.
