İsveçdə istehlak qiymətlərinin illik artım tempi 2026-cı ilin oktyabrında zəifləyərək 0,9%-ə düşüb. Bu göstərici sentyabrda 1,1% təşkil edirdi.
“Statistics Sweden”in cümə axşamı açıqladığı məlumatlara əsasən, oktyabr ayında istehlak qiymətləri indeksi əvvəlki ayla müqayisədə dəyişməyib. Beləliklə, aylıq inflyasiya 0,0% səviyyəsində qeydə alınıb.
İpoteka faiz dərəcələrinin təsirini nəzərə almayan CPIF göstəricisi də sentyabrdakı 1,5%-dən oktyabrda 1,1%-ə geriləyib. Enerji daşıyıcılarının qiymətləri istisna olmaqla hesablanan CPIF-XE indeksi isə 0,5%-dən 0,1%-ə enib.
“Qiymətlərdəki cüzi dalğalanmalar sentyabrdan oktyabra qədər aylıq dəyişmənin sabit qalmasına səbəb olub”, – deyə İsveç Statistika İdarəsinin qiymətlər üzrə statistiki Karolina Neander bildirib.
Aylıq müqayisədə enerji daşıyıcılarının qiymətlərində artım qeydə alınıb. Belə ki, oktyabrda elektrik enerjisi, qaz və digər yanacaq növləri sentyabrla müqayisədə 1,4% bahalaşıb. Avtomobil yanacağının qiyməti isə bir ay ərzində 3,7% yüksəlib.
İllik müqayisədə yanacağın qiyməti 25% artıb. Bu dövrdə dizel yanacağı 38%, benzin isə 16% bahalaşıb. Elektrik enerjisinin qiymətində də 14,3%-lik artım qeydə alınıb.
Elektrik enerjisi və yanacağın bahalaşması ölkədə illik inflyasiyaya ümumilikdə 1 faiz bəndi əlavə edib.
Enerji daşıyıcılarından fərqli olaraq, ərzaq məhsulları və alkoqolsuz içkilərin qiymətlərində azalma müşahidə olunub. Bu məhsulların dəyəri 2025-ci ilin oktyabrı ilə müqayisədə 7% aşağı düşüb. Nəticədə həmin kateqoriya ümumi inflyasiya göstəricisini 1 faiz bəndi azaldıb.
Süd məhsulları, şokolad, şəkər, şirniyyat və desertlər qiymətləri ən çox ucuzlaşan məhsullar arasında yer alıb.
Digər tərəfdən, mənzil kirayəsi illik müqayisədə 3,3%, fərdi evlərin saxlanılması xərcləri isə 9,6% bahalaşıb. Bar və restoran xidmətlərinin qiymətlərində də 2,7% artım qeydə alınıb.
Bununla yanaşı, stomatoloji xidmətlər 22,1%, yerli nəqliyyat xidmətləri isə 25,9% ucuzlaşıb. Statistik qurum bu azalmanın hər iki sahədə həyata keçirilən islahatlarla əlaqəli olduğunu qeyd edib.
Oktyabrda turizm paketlərinin qiymətləri də sentyabrla müqayisədə 10,8% azalıb. Bu ucuzlaşma ay ərzində enerji daşıyıcılarının bahalaşmasının inflyasiyaya təsirini qismən kompensasiya edib.
MONETAR.AZ
