Latın Amerikası və Karib hövzəsi iqtisadiyyatında artım tempinin 2026-cı ildə zəifləyəcəyi gözlənilir. BMT-nin Latın Amerikası və Karib Hövzəsi üzrə İqtisadi Komissiyasının (ECLAC) yeni hesabatına əsasən, regionun ümumi daxili məhsulu (ÜDM) bu il 2,2% artacaq.
Bu göstərici 2025-ci ildə qeydə alınan 2,4%-lik artımdan aşağıdır. ECLAC 2027-ci il üçün isə region iqtisadiyyatının 2,5% böyüyəcəyini proqnozlaşdırır.
Komissiya 2026-cı il üzrə əvvəlki proqnozunu da aşağı salıb. Dekabr ayında açıqlanan hesablamalarda region üçün 2,3%-lik artım gözlənilsə də, daha mürəkkəb beynəlxalq iqtisadi şərait proqnozun 2,2%-ə endirilməsinə səbəb olub.
ECLAC-ın qiymətləndirməsinə görə, xarici iqtisadi şərtlərin tədricən yaxşılaşması gözlənilsə də, region 2027-ci ilə qədər orta illik artım tempinin təxminən 2,3% təşkil etdiyi beşillik dövrü başa vuracaq.
Hesabatda Latın Amerikası iqtisadiyyatının qarşısında duran struktur problemlərinə də diqqət çəkilir. Aşağı investisiya səviyyəsi, məhsuldarlığın zəif artması və qeyri-formal məşğulluğun yüksək payı regionun iqtisadi potensialını məhdudlaşdıran əsas amillər sırasında göstərilir.
Bununla yanaşı, ECLAC region ölkələrinin makroiqtisadi sabitliyi qoruyacağını proqnozlaşdırır. Komissiyanın hesablamalarına görə, inflyasiya göstəriciləri də tədricən mərkəzi bankların müəyyən etdiyi hədəf səviyyələrə yaxınlaşacaq.
Aparıcı iqtisadiyyatlar üzrə proqnozlar isə fərqlənir. Braziliyanın ÜDM-nin həm 2026-cı, həm də 2027-ci ildə 2,2% artacağı gözlənilir. Meksika iqtisadiyyatının bu il 1,3%, gələn il isə 1,9% böyüyəcəyi proqnozlaşdırılır.
Argentina üçün 2026-cı ildə 3,3%, 2027-ci ildə isə 3,4%-lik iqtisadi artım gözlənilir. Venesuela regionun ən yüksək artım tempinə malik ölkələrindən biri olacaq: ölkə iqtisadiyyatının hər iki ildə 6,5% böyüyəcəyi proqnozlaşdırılır.
MONETAR.AZ
