2026-cı ilin yanvar-sentyabr aylarında Bakı şəhərində istehlak mallarının və əhaliyə göstərilən ödənişli xidmətlərin qiymətləri ötən ilin eyni dövrü ilə müqayisədə 4,8 faiz artıb. Naxçıvan iqtisadi rayonunda isə ümumi artım 9 faiz təşkil edib.
Monetar.az xəbər verir ki, Dövlət Statistika Komitəsinin iqtisadi rayonlar üzrə qiymət indeksləri paytaxtla bəzi regionlar arasında nəzərəçarpan fərq olduğunu göstərir.
Bakıda ərzaq məhsulları 5,9 faiz, qeyri-ərzaq malları 3,2 faiz, ödənişli xidmətlər isə 4,2 faiz bahalaşıb. Ölkə üzrə müvafiq göstəricilər 6,9 faiz, 3,7 faiz və 5,5 faiz təşkil edib.
Ümumi qiymət artımı Naxçıvandan başqa bəzi rayonlarda da yüksək olub. Lerikdə 8,5 faiz, Şabranda 8,3 faiz, Qobustanda isə 8,1 faiz artım qeydə alınıb.
Beləliklə, Bakı ilə Naxçıvan arasında ümumi qiymət artımı fərqi 4,2 faiz bəndi təşkil edib. Paytaxtda həmçinin ərzaq və qeyri-ərzaq malları, eləcə də xidmətlər üzrə artım ölkə üzrə orta göstəricilərdən aşağı olub.
