Beynəlxalq valyuta bazarlarında ABŞ dolları kəskin ucuzlaşaraq son altı həftənin minimum səviyyəsinə geriləyib. Buna səbəb ABŞ ilə İran arasında dialoqun yenidən bərpası və bunun nəticəsində investorların risk iştahının artması göstərilir.
Fevralın sonlarında regionda gərginliyin artması, xüsusilə İranın Hörmüz boğazını faktiki olaraq bağlaması qlobal enerji bazarlarında ciddi təlatüm yaratmışdı. Bu vəziyyət neft və qaz qiymətlərinin sürətlə yüksəlməsinə, eləcə də dünya iqtisadi artımı ilə bağlı narahatlıqların güclənməsinə səbəb olmuşdu. Daha sonra ABŞ-ın İran limanlarına qarşı cavab tədbirləri vəziyyəti daha da kəskinləşdirmişdi.
Lakin ABŞ Prezidenti Donald Trampın Pakistanda sülh danışıqlarının bərpasının mümkünlüyü ilə bağlı açıqlaması bazarlarda nikbinliyi artırıb. Bu xəbərlər fonunda dolların “təhlükəsiz liman” kimi cəlbediciliyi zəifləyib.
Avro məzənnəsi əvvəlki itkilərini bərpa edərək 1,17 dollar səviyyəsinə yaxınlaşıb. Britaniya funtu da sabitlik nümayiş etdirərək 1,35 dollar civarında qərarlaşıb. Dollar indeksi isə mart ayında qazandığı təxminən 3 faizlik artımı demək olar ki, tam itirib.
Bununla belə, ekspertlər ehtiyatlı mövqe saxlayırlar. Valyuta strateqləri hesab edirlər ki, bazar iştirakçıları vəziyyətin tezliklə normallaşacağına həddindən artıq optimist yanaşa bilərlər.
Yaponiya yeninin də zəifləməsi davam edir və dollar qarşısında 158,95 səviyyəsinə qədər geriləyib. Enerji qiymətlərinin artması fonunda bazarlar artıq əsas mərkəzi bankların faiz siyasəti ilə bağlı gözləntilərini də yenidən qiymətləndirirlər.
Mütəxəssislər bildirirlər ki, hazırkı vəziyyətdə həm geosiyasi risklər, həm də enerji bazarındakı qeyri-müəyyənliklər valyuta bazarlarında volatilliyi yüksək səviyyədə saxlayacaq.
MONETAR.AZ
