Bolqarıstan Milli Bankı ölkənin 2026-cı il yanvarın 1-dən avro zonasına inteqrasiyası çərçivəsində Avropa Mərkəzi Bankına (AMB) təxminən 2 ton qızıl təhvil verib.
Ümumdünya Qızıl Şurasının (World Gold Council – WGC) son hesabatına görə, Bolqarıstan avro zonasına keçidlə əlaqədar valyuta ehtiyatlarının bir hissəsini AMB-yə köçürüb.
Köçürülən ehtiyatlar 85:15 nisbətində xarici valyuta və qızıldan ibarət olub. Təhvil verilən aktivlərin əvəzində Bolqarıstan Mərkəzi Bankı AMB-yə qarşı balansında aktiv kimi uçota alınan pul tələbi hüququ əldə edib.
Bolqarıstanın ümumi qızıl ehtiyatlarının azalmasının qarşısını almaq üçün AMB-yə təhvil veriləcək qiymətli metal əvvəlcədən xüsusi olaraq satın alınıb.
WGC-nin məlumatına görə, dünya mərkəzi bankları avqust ayında xalis olaraq 39 ton qızıl alıblar. Yanvar-avqust dövründə isə xalis alışların həcmi 170 tona çatıb.
Avqustda ən böyük alıcı Çin Xalq Bankı olub. Çin Mərkəzi Bankı ehtiyatlarına 20 ton qızıl əlavə edib və bununla da ardıcıl 22-ci ay qızıl alışını həyata keçirib. İlin əvvəlindən Çinin qızıl alışları 80 tona çatıb.
Polşa yanvar-avqust aylarında 98 ton, o cümlədən avqustda 8 ton qızıl alıb. Özbəkistan avqustda 8 ton, ilin əvvəlindən isə ümumilikdə 50 ton qızıl əldə edib. Ölkənin qızıl ehtiyatları ümumi valyuta ehtiyatlarının 90 faizini təşkil edir.
Qazaxıstan avqustda 7 ton, ilin əvvəlindən isə təxminən 36 ton qızıl alıb. Qızıl ölkənin ehtiyatlarının 79 faizini təşkil edir.
Çexiya ardıcıl 42 aydır qızıl ehtiyatlarını artırır. Ölkə avqustda daha 2 ton qızıl alıb və ilin əvvəlindən ehtiyatlarını 14 ton artıraraq ümumi həcmi 86 tona çatdırıb. Türkiyə avqustda 3 ton, Boliviya və Qana isə təxminən 1 ton qızıl alıb.
Mərkəzi banklar arasında əsas satıcılardan biri Rusiya olub. Rusiya Bankı avqustda qızıl ehtiyatlarını daha 6 ton azaldıb. İlin əvvəlindən ölkənin qızıl satışları 56 ton təşkil edib və ümumi ehtiyatlar 2 271 tona düşüb.
İordaniya isə avqust ayında 3 ton qızıl satıb.
WGC qeyd edir ki, mərkəzi bankların qızıl əməliyyatları əsasən ehtiyatların idarə olunması üzrə uzunmüddətli strategiyaları əks etdirir. Aylıq dəyişikliklər isə ayrı-ayrı ölkələrin alış proqramları, bazar şərtləri və likvidlik ehtiyaclarından asılı olaraq fərqlənə bilər.
Hesabata görə, iqtisadi və geosiyasi qeyri-müəyyənlik qızıl tələbatına təsir edən amillərdən biri olaraq qalır. Bununla belə, mərkəzi bankların qızıl strategiyasındakı əsas meylləri qiymətləndirmək üçün daha uzunmüddətli göstəricilərə baxmaq tələb olunur.
MONETAR.AZ
