Singapore Airlines şirkət tarixində ən böyük təyyarə salonlarının yenilənməsi proqramına start verməyə hazırlaşır. Aviaşirkətin açıqladığı məlumata görə, uzaqməsafəli uçuşlarda istifadə olunan təyyarələrin dörd xidmət sinfini əhatə edəcək layihənin dəyəri 2 milyard Sinqapur dollarını (təxminən 1,6 milyard ABŞ dolları) ötəcək.
Modernizasiya çərçivəsində yeni salonların quraşdırılmasına 2027-ci ilin ikinci yarısından başlanılması planlaşdırılır. Proqram ümumilikdə 72 təyyarəni əhatə edəcək. Yenilənmə həm əsaslı təmir və modernizasiyadan keçəcək Airbus A350-900 modellərinə, həm də sifariş edilmiş yeni Boeing 777-9 təyyarələrinə şamil olunacaq. Bu hava gəmiləri şirkətin uzaqməsafəli uçuşlar üzrə donanmasının əsasını təşkil edəcək.
Layihənin diqqətçəkən yeniliklərindən biri birinci sinif salonlarının yenidən qurulmasıdır. Yeni dizayna əsasən, mərkəzdə yerləşən oturacaqlar birləşdirilərək iki nəfərlik çarpayıya çevrilə biləcək. Şirkətin məlumatına görə, bu konstruksiya kommersiya aviasiyasında mövcud olan ən böyük ikinəfərlik çarpayı olacaq.
Biznes sinifdə isə Singapore Airlines tarixində ilk dəfə sürüşən məxfilik qapıları tətbiq ediləcək. Bu yenilik sərnişinlərə uçuş zamanı daha çox fərdi məkan və rahatlıq təmin etməyə hesablanıb.
Singapore Airlines-ın genişmiqyaslı investisiya planı qlobal aviasiya bazarında müşahidə olunan ümumi tendensiya ilə üst-üstə düşür. Air France, British Airways və United Airlines kimi beynəlxalq daşıyıcılar da təyyarələrin premium salonlarına sərmayələri artırırlar.
Yanacaq qiymətlərinin kəskin yüksəlməsi və ekonom-klass uçuşlarına tələbatın zəifləməsi aviaşirkətləri daha yüksək gəlirlilik potensialına malik premium seqmentə yönəldir. Bu şəraitdə birinci və biznes sinif xidmətlərinin təkmilləşdirilməsi daşıyıcıların gəlirlərini və mənfəət marjasını qorumaq strategiyasının mühüm hissəsinə çevrilir.
Singapore Airlines-ın yeni proqramı da uzaqməsafəli uçuşlarda sərnişin komfortunu artırmaqla yanaşı, şirkətin premium xidmətlər bazarındakı mövqeyini gücləndirməyə yönəlib.
MONETAR.AZ
