Yapon yeni həftənin ilk ticarət günündə 1 dollar üçün 161,7 yen səviyyəsində qalaraq 1986-cı ildən bəri ən zəif göstəricilərdən birinə yaxın olub.
Yenin təzyiq altında qalmasına baxmayaraq, Yaponiyada iqtisadi göstəricilər müsbət dinamika nümayiş etdirib. Ölkədə pərakəndə satışlar may ayında illik müqayisədə 5,3 faiz artıb. Bu, 2023-cü ilin noyabrından bəri ən sürətli artım tempi hesab olunur. Artım əsasən hökumətin stimullaşdırıcı tədbirləri nəticəsində istehlak xərclərinin yüksəlməsi ilə əlaqələndirilir.
İqtisadi göstəricilərin yaxşılaşması və Yaponiya Mərkəzi Bankı rəsmilərinin daha sərt pul siyasətinə dair açıqlamaları faiz dərəcələrinin bu il ərzində yenidən artırıla biləcəyi gözləntilərini gücləndirib.
Yaponiya Bankının növbəti faiz qərarını iyulun 31-də açıqlayacağı gözlənilir.
Bununla belə, yen hələ də dollar qarşısında təzyiq altındadır. ABŞ dollarının möhkəmlənməsi, ABŞ və Yaponiya faiz dərəcələri arasındakı böyük fərq, eləcə də Federal Ehtiyat Sisteminin gələcəkdə faiz artımına dair gözləntilər Yaponiya valyutasına mənfi təsir göstərir.
Yaponiya Maliyyə Nazirliyinin dəfələrlə xəbərdarlıq etməsinə və təxminən iki ay əvvəl rekord həcmdə valyuta müdaxiləsi həyata keçirilməsinə baxmayaraq, yenin zəifləməsi davam edir.
MONETAR.AZ
