Süni intellekt texnologiyalarının sürətli inkişafına baxmayaraq iri investisiya bankları yaxın illərdə analitiklərin işə qəbulunu əhəmiyyətli dərəcədə azaltmağı planlaşdırmır. Bu barədə Reuters Breakingviews-in apardığı araşdırmada bildirilir.
Məlumata görə, Goldman Sachs, Morgan Stanley, JPMorgan və digər aparıcı investisiya banklarında analitiklərin hazırlanması proqramları qüvvədə qalacaq. Hətta bəzi maliyyə qurumları bu istiqamətdə işə qəbulu artırmağı nəzərdə tutur.
Araşdırmada qeyd olunur ki, süni intellekt tərəfindən hazırlanan maliyyə modelləri və təqdimatlar hələlik tam etibarlı hesab edilmir. Bank rəhbərləri bildirirlər ki, maliyyə hesabatlarında mümkün səhvlər ciddi risklər yarada bilər və buna görə də gənc analitiklərin iştirakı vacibliyini qoruyur.
Ekspertlərin fikrincə, bankların analitik proqramlarından imtina etməməsinin digər səbəbi kadr hazırlığıdır. İdarəedici direktor vəzifələrinə yüksələn mütəxəssislərin əksəriyyəti məhz analitik kimi fəaliyyətə başlayır. Buna görə də bu proqramlar gələcək rəhbər kadrların yetişdirilməsi üçün əsas mərhələ hesab olunur.
Bununla yanaşı, bank rəhbərləri hesab edirlər ki, süni intellekt iş prosesini sürətləndirsə də, analitiklərin iş yükünün azalacağına dair qəti proqnoz vermək mümkün deyil. Bəzi ekspertlər yeni texnologiyaların əməkdaşlara daha mürəkkəb tapşırıqlara vaxt ayırmaq imkanı yaradacağını desələr də, digərləri məhsuldarlığın artmasının iş həcmini daha da yüksəldə biləcəyini istisna etmirlər.
Reuters Breakingviews-in qənaətinə görə investisiya bankçılığı sahəsində analitik peşəsi süni intellekt dövründə də aktuallığını qoruyacaq. Lakin bu sahədə uzun iş saatları və yüksək iş yükünün də yaxın perspektivdə dəyişməyəcəyi gözlənilir.
MONETAR.AZ
