Alman Hava Limanları Assosiasiyasının baş direktoru Ralf Beisel bildirib ki, Almaniyadakı hava limanları aviayanacaq qiymətlərinin kəskin bahalaşması səbəbindən daşınma gücünün ciddi azalacağını gözləyirlər. İranla müharibənin yaratdığı yanacaq böhranının genişmiqyaslı reys ləğvlərinə səbəb ola biləcəyi qeyd olunur.
“2026-cı il üçün optimist ssenari sərnişin axınının sabit qalmasıdır. Ən pis halda isə bəzi hava limanlarında daşımaların həcminin 10% azalacağı gözlənilir. Bu, ölkə üzrə təxminən 20 milyon sərnişinə təsir göstərə bilər”, — deyə Bayzel Die Welt qəzetinə müsahibəsində bildirib.
Assosiasiyanın qiymətləndirməsinə görə, reyslərin ləğvi təhlükəsi təkcə fiziki yanacaq çatışmazlığı ilə bağlı deyil. Hazırda əsas problem təyyarələrin yanacaqla təmin edilməsinin həddindən artıq baha başa gəlməsidir.
“Kerosi̇n qiymətləri artıq iki aydan çoxdur ki, münaqişədən əvvəlki səviyyədən iki dəfə yüksəkdir. Yaxın aylarda vəziyyətin normallaşacağını gözləmirik”, — deyə assosiasiya rəhbəri vurğulayıb.
Almaniya hava limanları hökumətdən dəstək istəyirlər. Bayzelin sözlərinə görə, qısamüddətli dövrdə aviasiya vergisinin tətbiqi dayandırılmalı, orta müddətli perspektivdə isə ən azı iki dəfə azaldılmalıdır.
Bundan əvvəl ABŞ-ın ən ucuz aviabiletləri ilə tanınan Spirit Airlines aviaşirkəti fəaliyyətini dayandırdığını elan etmişdi. 1990-cı illərin əvvəlindən fəaliyyət göstərən şirkət rəhbərliyi də əsas səbəblərdən biri kimi yanacaq qiymətlərinin ciddi artımını göstərmişdi.
MONETAR.AZ
