Nikkei Asia yazır ki, 2026-cı ilin yanvar-iyun aylarında qlobal yeni avtomobil satışlarında yalnız benzin mühərriki ilə çalışan avtomobillərin payı 49 faizə enib. Beləliklə, bu göstərici 1920-ci illərdən bəri ilk dəfə ümumi bazarın yarısından aşağı düşüb.
Benzinlə işləyən avtomobillərin payı il ərzində 3 faiz bəndi azalıb, satışların həcmi isə 10 faiz geriləyərək 20,25 milyon ədədə düşüb. Beş il əvvəl, 2021-ci ildə bu avtomobillər qlobal bazarın 73 faizini təşkil edirdi.
Nikkei bu dəyişimi Yaxın Şərqdəki münaqişə fonunda neft qiymətlərinin yüksəlməsi ilə əlaqələndirir. Bahalaşan yanacaq xərcləri benzinlə işləyən avtomobillərin istifadəsini daha baha edir.
Mobility Global analitiki Yoşiaki Kavano bildirib ki, 2024-cü ildə elektromobillərə subsidiyaların dayandırılmasından sonra hibrid modellərə maraq artsa da, yüksək neft qiymətləri istehlakçıların elektromobillərin daha aşağı istismar xərclərinə yenidən diqqət yetirməsinə səbəb olur.
Batareyaların ucuzlaşması da bu tendensiyanı dəstəkləyir. BloombergNEF-in məlumatına görə, 2025-ci ildə akkumulyator batareyalarının orta qiyməti 1 kVt·saat üçün 99 dollar olub və ardıcıl ikinci il 100 dollardan aşağı qalıb.
Seoul Economic Daily-nin məlumatına görə, 2026-cı ilin ilk yarısında qlobal elektromobil satışları 12 faiz artaraq 6,87 milyon ədədə çatıb. Onların yeni avtomobil satışlarında payı isə 3 faiz bəndi yüksələrək 17 faizə çatıb.
Avropada elektromobil satışları 32 faiz artaraq 1,81 milyon ədədə yüksəlib. Beləliklə, regionun 31 böyük ölkəsində yarımillik nəticələr üzrə elektromobillər ilk dəfə benzinlə işləyən avtomobillərin satışını geridə qoyub.
Cənub-Şərqi Asiyada 350 min elektromobil satılıb ki, bu da illik müqayisədə 81 faiz artım deməkdir. Okeaniyada satışlar 2,2 dəfə artaraq 110 min ədədə çatıb.
Eyni dövrdə benzinlə işləyən avtomobillərin satışları Çində 26 faiz, Avropada isə 13 faiz azalıb.
Şimali Amerikada federal vergi güzəştlərinin ləğvi elektromobil bazarına mənfi təsir göstərib. Benchmark Mineral Intelligence-in məlumatına görə, 2026-cı ilin ilk beş ayında elektromobil satışları əvvəlki ilin eyni dövrü ilə müqayisədə 25 faiz azalıb.
Çində isə elektromobillər 2014-cü ildən bəri ilk dəfə alqı-satqı vergisinə cəlb olunub, köhnə avtomobillərin yenilənməsi proqramı da əvvəlki ilə nisbətən daha az sərfəli olub. Çin Sərnişin Avtomobilləri Assosiasiyasının (CPCA) məlumatına görə, ilin ilk yarısında yeni enerjili avtomobillərin pərakəndə satışları 13 faiz azalaraq 4,73 milyon ədədə düşüb.
Bununla belə, uzunmüddətli perspektivdə Çində elektromobillərin payının artacağı gözlənilir. Sinopec Elmi-Tədqiqat İnstitutunun vitse-prezidenti Feyri Van Sinqapurda keçirilən APPEC konfransında bildirib ki, elektromobillər və qoşulan hibridlərin Çində yeni avtomobil satışlarındakı payı 2030-cu ilə qədər 75–80 faizə çata bilər.
2026-cı ilin iyulunda bu göstərici 65 faiz təşkil edib. Bir il əvvəl isə elektromobillər və PHEV-lərin yeni avtomobil satışlarında payı 53 faiz olub.
MONETAR.AZ
