Çinin süni intellekt və robototexnika nəhənglərindən biri olan GigaBrain şirkəti, texnologiya dünyasında böyük əks-səda doğuran bir yeniliyə imza atıb. Şirkət ölkənin ilk tam universal ev robotu olan Shiguang S1 modelini ictimaiyyətə təqdim edib.
Bu cihaz, indiyə qədər zavodlarda və sənayedə görməyə vərdiş etdiyimiz robotlardan köklü şəkildə fərqlənir. "Shiguang S1" sırf insan mühiti və gündəlik məişət qayğıları üçün dizayn edilib.
Yeni nəsil ev köməkçisi insan həyatını asanlaşdıracaq çoxşaxəli funksiyalar toplusuna malikdir:
-
Ev işlərinin tam idarə olunması: Robot sərbəst şəkildə paltarları qatlayır, masanı yığışdırır, qabları yerləşdirir və ilkin səviyyəli yeməkləri hazırlaya bilir.
-
Sosial adaptasiya və baxım: Yaşlı insanlarla empatiya quraraq intellektual söhbətlər aparmaq, onlara dərman vaxtlarını xatırlatmaq kimi sosial funksiyaları yerinə yetirir.
-
Sonsuz öyrənmə potensialı: Robot sabit proqramla işləmir. Evə daxil olduğu ilk gündən etibarən ətrafı skan edir, əşyaların yerini yadda saxlayır və sahibinin vərdişlərinə uyğun olaraq yeni işləri vizual müşahidə vasitəsilə daxili bazasına öyrədir.
Cihazın arxasında duran əsas güc GigaBrain tərəfindən məişət şəraiti üçün xüsusi olaraq optimallaşdırılmış süni intellekt mühərrikidir. Şirkətin vitse-prezidenti Ye Yun robotun iş prinsipini sənaye robotları ilə müqayisədə belə izah edib: "Müasir zavod robotları santimetrlərlə ölçülmüş sərt və dəyişməz təlimatlarla (kodlarla) fəaliyyət göstərir. Əgər konveyerdə bir detalın yeri 2 santimetr sürüşərsə, sistem iflic olur. Lakin Shiguang S1 tamamilə fərqlidir. O, hərəkətlərini özü planlaşdırır, qarşısına çıxan maneəni görür və dərhal ətrafdakı dəyişikliklərə real vaxt rejimində adaptiv reaksiya verir."
Ev mühitində robotun hərəkət etməsi təhlükəsizlik suallarını doğurduğu üçün mühəndislər cihazı xüsusi "həssas toxunuş və dayandırma" sensorları ilə təchiz ediblər. Robot hərəkət edərkən təsadüfən evdəki hər hansı bir insana, uşağa və ya ev heyvanına (it, pişik və s.) yüngülcə toxunarsa, potensial zədə və ya qəza riskinin qarşısını almaq üçün milisaniyələr ərzində fəaliyyətini tamamilə dondurur.
Şirkət robotun kütləvi satışından öngə real ev şəraitində sınaqlarına start verir. Çinin Wuhan şəhərində yaşayan ailələr artıq rəsmi müraciət edərək "Shiguang S1" modelinin erkən test proqramına (baza sınaqlarına) pulsuz qoşula bilərlər. Ekspertlər bu addımın yaxın 10 ildə Çində gözlənilən işçi qüvvəsi çatışmazlığı və əhalinin qocalması fonunda sosial xidmət sektorunu xilas edəcək qlobal bir trendin başlanğıcı olduğunu qeyd edirlər.
MONETAR.AZ
