ABŞ-ın ixrac məhdudiyyətləri və Çin texnologiya şirkətlərinin sürətli inkişafı fonunda “Nvidia”nın Çinin süni intellekt (Sİ) çipləri bazarındakı mövqeləri zəifləyib.
“Reuters” agentliyinin IDC tədqiqat şirkətinin məlumatlarına istinadən yaydığı xəbərə görə, “Nvidia” 2026-cı ilin ilk altı ayında Çindəki məlumat emalı mərkəzlərinə 678 min Sİ çipi tədarük edib. Bu, ötən ilin eyni dövrü ilə müqayisədə 44% azdır. Nəticədə şirkətin Çin bazarındakı payı 34%-ə enib.
Satışların azalmasının əsas səbəblərindən biri ABŞ-ın “Nvidia”nın qabaqcıl süni intellekt çiplərinin Çinə ixracına tətbiq etdiyi məhdudiyyətlərdir. Çin tərəfi isə ABŞ tərəfindən satışına icazə verilən məhdud sayda çip modelinə maraq göstərməyərək yerli istehsalçılara üstünlük verməyə çalışır.
“Nvidia”nın bazar mövqeyinin zəifləməsi Çinin yerli çip istehsalçılarının güclənməsi ilə eyni vaxta təsadüf edir. Ölkənin texnologiya nəhəngi “Huawei” ilə yanaşı, “Alibaba”nın çip layihələndirmə bölməsi T-Head, “Cambricon”, “Baidu”nun Kunlunxin bölməsi və “Hygon” daha rəqabətqabiliyyətli məhsullar hazırlamaq və istehsal həcmlərini artırmaq istiqamətində fəaliyyətlərini genişləndirirlər.
IDC-nin məlumatlarına əsasən, Çin Sİ çipləri bazarında şirkətlərin pay bölgüsü belədir:
-
Huawei: 28%
-
T-Head (Alibaba): 7%
-
Cambricon: 5%
-
Kunlunxin (Baidu): 4%
-
Hygon: 3%
Beləliklə, “Huawei” 28%-lik payla Çin istehsalçıları arasında lider mövqedə qərarlaşıb.
ABŞ və Çin arasında qabaqcıl texnologiyalar sahəsində rəqabət dərinləşdikcə süni intellekt çipləri strateji əhəmiyyətini artırır. Süni intellekt modellərinin hazırlanması və tətbiqinin genişlənməsi məlumat emalı mərkəzlərinə və yüksək hesablama gücünə malik çiplərə qlobal tələbatı artırır.
İxrac məhdudiyyətləri “Nvidia”nın Çin bazarındakı fəaliyyətinə təzyiq göstərdiyi halda, yerli istehsalçıların inkişafı Çinin texnoloji təchizat sahəsində xarici şirkətlərdən asılılığını azaltmaq səylərini gücləndirir.
MONETAR.AZ
