Kanadanın milli aviadaşıyıcısı "Air Canada" texniki xidmət və əməliyyat dəstəyi bölmələrində çalışan 11 min əməkdaşı təmsil edən Maşinistlər və Aviasiya-Kosmos İşçilərinin Beynəlxalq Assosiasiyası ilə ilkin kollektiv əmək müqaviləsi barədə razılığa gəlib.
Şirkətin yaydığı məlumata görə, razılaşma texniki əməliyyatlar, hava limanı və yük xidmətləri, logistika, eləcə də təchizat sahələrində çalışan işçiləri əhatə edir.
İlkin razılaşmaya əsasən, dörd illik kollektiv müqavilə 1 aprel 2026-cı il tarixindən qüvvəyə minəcək və 31 mart 2030-cu il tarixinədək etibarlı olacaq.
"Air Canada" bildirib ki, yeni sənəd əməkdaşların peşəkarlığını və şirkətin fəaliyyətinə verdikləri töhfəni qiymətləndirmək məqsədi daşıyır. Bununla yanaşı, müqavilənin qüvvəyə minməsi üçün həmkarlar ittifaqının üzvləri tərəfindən ratifikasiya olunması tələb edilir. Səsvermənin yaxın günlərdə başa çatacağı gözlənilir.
Razılaşma təsdiqlənərsə, bu, "Air Canada" tərəfindən 2026-cı ildə imzalanan altıncı kollektiv əmək müqaviləsi olacaq. Şirkət bunun əmək münasibətlərinin sabitliyinin qorunması və fəaliyyətin fasiləsiz davam etdirilməsi baxımından mühüm addım olduğunu vurğulayıb.
MONETAR.AZ
