Azərbaycanlı zəvvarların Həcc ziyarətinin icrasından sonra Vətənə dönüş mərhələsi davam edir. Bu gün müqəddəs Mədinə şəhərindən zəvvarların ilk qrupunu daşıyan təyyarə Bakıya istiqamət alıb və günorta saatlarında paytaxta enişi gözlənilir.
Üç gün əvvəl Məkkədəki Həcc rituallarını tamamlayaraq Peyğəmbər şəhərinə gələn bu qrupun ardınca, günorta saatlarında daha bir zəvvar qrupunun da Vətənə yola salınması planlaşdırılır.
Məkkə ilə tamamilə vidalaşan sonuncu azərbaycanlı zəvvar qrupları da artıq Mədinəyə çatıblar. İslam ənənəsinə uyğun olaraq, zəvvarlar bu şəhərdə 3 gün qalaraq mühüm dini məkanları ziyarət edirlər:
-
Peyğəmbər Məscidi (Məscidül-Nəbəvi): İslamın ən müqəddəs ibadətgahlarından biri və Məhəmməd Peyğəmbərin (s.ə.s.) qəbrinin yerləşdiyi məkan.
-
Quba məscidi: İslam tarixində inşa edilən ilk məscid.
-
Bəqi qəbiristanlığı: Peyğəmbərin ailə üzvlərinin, xanımlarının və bir çox böyük səhabənin dəfn olunduğu müqəddəs məkan.
-
Uhud dağı: İslam tarixinin ən mühüm döyüşlərindən birinin baş verdiyi və Uhud şəhidlərinin uyuduğu ərazi.
Bu mənəvi proqramı tamamlayacaq sonuncu zəvvar qrupunun iyunun 9-da Bakıya uçması ilə bu ilki Həcc mövsümü Azərbaycan üçün tamamilə başa çatacaq. Qeyd edək ki, Məkkədən Bakıya ilk zəvvar qrupu mayın 31-də qayıdıb.
Xatırladaq ki, mayın sonundan başlayan dönüş prosesi həm Məkkədən birbaşa reyslərlə, həm də missiyanın ikinci mərhələsi olaraq Mədinə üzərindən həyata keçirilir. Yaxın günlərdə bütün azərbaycanlı zəvvarlar tam şəkildə Vətənə geri dönmüş olacaqlar.
